Seminario Prevent Now cu tema “Road Safety” di ENNIA exitoso

ORANJESTAD - E seminario Prevent Now cu tema “Road Safety” di ENNIA a resulta exitoso. Recientemente a tuma luga e di dos seminario Prevent Now organisa dor di ENNIA. E compania a trece hunto expertonan di Aruba y Hulanda pa elabora riba diferente topico cu ta parti di e tema mas amplio “Road Safety”. E interes pa e seminario tabata abrumador y combersacionnan cu a surgi basa riba e informacion comparti ta prueba di e necesidad di seminarionan cu ta duna informacion integral riba diferente tereno den nos comunidad.

FIRE PREVENTION

Aña pasa ENNIA a presenta e topico “Fire Prevention”. Considerando e cantidad grandi y por bisa casi for di proporcion normal, di accidente di auto y e impacto cu esaki tin den e comunidad, tanto financieramente como riba salud di esunnan envolvi, a scoge pa e tema di prevencion di accidente y topiconan cu ta pas den e cuadro di esaki.

PAKICO TA CONSIDERE UN EXITO ROTUNDO

Jos Solognier di ENNIA a observa cu e seminario tabata un exito rotundo y e cantidad di hende cu a acudi, di tur diferente ramo y edad, ta muestra di e necesidad cu tin pa informacion. ENNIA tin como meta pa su seminarionan pa lanta conciencia den comunidad tocante prevencion di incidentenan cu por causa daño na cualkier aspecto di bida humano. Jos Solognier a splica cu e seminario gratis Prevent Now ta un evento anual cu ENNIA lo sigui ofrece.

CUERPO DI BOMBERO

Durante di e seminario tabata presente tambe Ferdinand Ponson, kende ta hefe di e departamento di Preventie di Cuerpo di Bombero. El a remarca cu el a scucha hopi tip cu ta trata topiconan cu hopi biaha hendenan ta tuma “for granted” y cu e informacion ta valioso pa comparti cu sernan keri y colega pa contribui na baha accident di trafico na Aruba.

PARLAMENTARIO

Parlamentario Lorna Varlack tambe tabata presente a titulo personnel y el a expresa cu e ta contento di a tuma e decision di atende e seminario. E informacion cu a wordo comparti ta contribui na un forma hopi positivo na su trabou y ta topiconan cu ta bon pa e tin detayenan asina valioso di nan pa asina por tin un miho bista riba cosnan manera e discusion riba leynan nobo, tanto den e parti di leynan nobo di trafico como otro aspectonan di husticia cu tin di haci cu trafico.

POLIS

Alto Inspector Aldrick Croes, District chef di warda di Santa Cruz, a splica cu el a scucha diferente informacion cu p’e ta nobo. E splicacion amplio riba topiconan manera candela den trafico tabata un di e topiconan cu a capta su interes sigur. El a bisa cu como polis semper nan ta enfoca riba e accidente mes, pero el a haya awo un bista mas amplio riba otro cosnan manera e gastonan envolvi, e trayecto cu un hende ta pasa aden despues di e accident, particularmente den e informacion cu departamento di salud publico a presenta tocante morbilidad.

DESPA

Di Departamento di Salud Publico a conta tambe cu presencia di Minouche Lopez, kende ta encarga cu Promocion di Salud.

Lopez a comenta cu e seminario tabata fantastico y ta un hecho cu tin problema den trafico y nan ta pendiente y consciente di esaki y e ta di opinion cu mester purba traha hunto pa minimalisa e cantidad di accidentenan y su consecuencianan riba bida di hende. El a menciona cu loke ta capta atencion ta cu personanan ta keda cu tanto problema pa nan trabao, den comunidad y hasta e consecuencianan di un accident por tin su influencia den e parti di enseñansa.

CIFRANAN PRECUPANTE

Departamento di Salud Publico ta preocupa pa e cifranan cu nan ta mira na Aruba cu ta hopi halto compara cu otro pais, Minouche Lopez a comenta. El a agrega cu e seminario ta un “boost” pa cera cabez entre e instancianan concerni pa sigui lanta conciencia pa e comportacion den trafico mehora na Aruba.

EXPERIENCIA DI PENSHONADO

E seminario Prevent Now a atrae tambe profesionalnan cu ta disfrutando di nan pensioen. Awo bek na Aruba despues di casi 40 aña cu el a biba y traha na Hulanda, ta Juan Williams. El a retira como Polis di Korps Rijkspolitie Utrecht y a bisa cu e seminario tabata un experiencia fantastico y hopi bon organisa cu bon oradornan y contenido.

TRECE INSTANCIA HUNTO

Loke ENNIA a haci aki awe ta trece instancianan hunto pa bay den e mesun direccion, el a comenta. Williams a conclui bisando cu e ta haya cu un paso a wordo tuma den e bon direccion y cu mester bin hunto companianan di seguro, Polis, Bombero, Gobierno y departamento di ambulans pa traha como un team pasobra el a ripara cu mester encurasha miho y mas comunicacion entre nan tambe.

GERENTE DI ENNIA

Di acuerdo cu Henry van den Berg, gerente general di ENNIA, "cada ora ta sosode un accidente di trafico na Aruba, pero hopi hende ainda no ta consciente di esaki. Prevencion di accidente ta responsabilidad di tur hende". Ta den esaki claro cu ENNIA ta haci un esfuerso adicional pa subraya e importancia di prevencion y evita accidentenan innecesario