Fun Miles cu donacion pa Animal Rights Aruba

ORANJESTAD – Pa ta franco, hopi animal riba nos isla no tin un dushi bida; apenas nan tin un bida mes. Nan no tin un hogar pa bai anochi y niun hende pa duna nan cuminda ni pa stima nan. Esaki a motiva Fun Miles pa haci un donacion di 2500 Florin na e organisacion caritativo Animal Rights Aruba (ARA), cu ta trahando hopi duro pa recauda fondo pa construi un shelter nobo pa Aruba su pushi- y cachonan indesea, caminda no ta mata e bestianan.

CAMPAÑA WE NEED A SHELTER

Ya for di 4 di oktober (Dia Mundial di Animal) 2014, ARA ta promoviendo su campaña ‘We Need a Shelter’ den colaboracion cu Radio Magic 96.5 FM. E meta: recauda suficiente fondo pa construi un shelter digno pa tur e pushi- y cachonan cu ta biba riba caya na Aruba; un lugar caminda nan por warda sano y salvo riba nan adopcion. Pa logra esaki, ARA ta bende ‘kavel’ simbolico den e futuro shelter pa un donacion di 250 Florin pa cada un. Fun Miles a cumpra 10 di e kavelnan aki, pero ARA mester bende por lo menos 1000 kavel pa por realisa e shelter aki. Fun Miles ta curasha tur hende pa contribui y yuda salba bida di e gran cantidad di pushi- y cachonan abandona. Pa mas informacion tocante ARA y con pa haci un donacion: www.animalrightsaruba.com . Riba e portret: Fun Miles Account Manager Emily Faro y representante di ARA Andreina Wever