Minister Oduber: Radisson hotel no ta sera su porta

ORANJESTAD – Radisson Hotel no ta bay sera, sino mas bien ta e edificio so ta wordo bendi. Esaki ta e mensahe cu minister encarga cu turismo Otmar Oduber a clarifica e siman aki na prensa. Asina e ta desmenti e informacion suministra pa presidente di FTA, Rudy Geerman. Geerman a declara recientemente cu tin problema cu trahamento di CAO cu trahadonan pasobra e hotel ta na benta y ta bay sera. Oduber ta lamenta expresionnan haci riba e caso di benta di edificio di Radisson dor di Geerman y partidonan politico den oposicion. E mandatario ta splica cu a sali diferente relatonan di parti miembronan di parlamento di partido MEP cu ta haci como si fuera cu esaki ta noticia nobo.

Segun Oduber, ta e edificio so ta na benta, pero cu e operador, esta Carlson Group ta keda maneha e hotel. Un forma di opera cu nan ta hibando pa basta tempo caba y a aplica na varios otro destinacion. Tin 13 grupo interesa, segun Oduber, y no ta conoci si ken ta haya esaki. E benta di e edificio, segun Oduber, tampoco no ta pasobra cos ta bayendo malo pa e hotel. Intencion ta pa cambia e hotel y upgrade esaki den un Radisson Blue na Aruba. Pa loke ta e derechonan di trahadonan, esaki ta garantisa segun leynan laboral di Aruba y como tal no mester tin panico