Corte: Yobida di placa for di den plafond den caso ‘van Rey’

ORANJESTAD – Usando 10 container di e compania Arubano Arubras, Hennie van Rey (ruman di politico Hulandes controversial Jos van Rey) tabata sconde 23,5 miyon euro entre galiña congela di su fabrica Castimex na Roermond. Esaki tabata destina pa transporte pa Aruba, cu destinacion final Venezuela, unda cu e hefe grandi Chichi, cu ta uza e nomber Papa, mester a ricibi esaki.

CASO GRANDI LABAMENTO DI PLACA

Ta considera esaki como un di e casonan mas grandi di labamento di placa unda cu e dos protagonistanan, Ramon Helgers y Rupert Genser, mester a presenta diabierna mainta dilanti mesa berde.

PRO FORMA

E caso a wordo trata pro forma awe mirando cu e investigacion (despues di 3 luna y mei) ainda ta den full swing, segun e fiscal Bart Smitz. El a spera tambe diabierna pa haya un contesta riba su peticion di extradicion na Venezuela di un di tres sospechoso, M. de Souza, cu tin e apodo di ‘E rabo’ door di su amigonan.

DOSSIER CLA

Comienso di januari 2016 Ministerio Publico ta spera di por tin e dossier cla. Banda di Aruba, Hulanda, Venezuela y Belgica, e investigacion ta tumando lugar tambe na Suiza y Croatia. 

SACO CU PLACA

Un otro factor ta cu e sospechosonan Helgers y Genser no kier coopera. Esey ta significa mas trabou investigativo, segun e fiscal a splica huez. Tin un cantidad di documentacion, factura y telefon. Ademas, e pandiya tabata usa un codigo pa comunica. Pero tin biaha cos tabata bay mas facil. Como ehempel, e fiscal a conta con un miembro di recherche a pasa door di plafond na e cas di Genser, y saconan di placa tabata yobe bin abou.

Di   Caribisch Netwerk   Autor: Sharina Henriquez    foto: Ministerio Publico Aruba.