FTA: Proteccion di trabou fiho pa trahador ta na peliger

ORANJESTAD – E proteccion di trabou fiho pa un trahador ta na peliger, segun sindicato FTA.  Y despues di e ultimo tripartiet riba e topico di cambio di ley laboral (specificamente eliminacion di articulo 1613X for di Codigo Civil) tin un impasse entre gremio sindical, comercial y gobierno. Manera cu NoticiaCla.com a relata anteriormente riba e tema, sindicato FTA tin problema cu e intencion di gobierno pa elimina e articulo 1613X for di e Codigo Civil, y asina complace gremionan manera WAB, ATIA y AHATA. Y tin indicacion segun FTA, cu gobierno ta sostene e gremionan. De hecho, segun abogado di e sindicato, Hose Figaroa, esey tabata hopi cla durante e tripartiet riba e tema.

PROTECCION PA TRAHADO

Tin un proteccion den ley actual pa e trahador, cu ta sigura cu solamente den cierto situacion por tuma e trahador a base di un contract di trabou defini. Specificamente e ley ta menciona 4 situacion, manera si tin necesidad di trahador temporario pa un parti di aña (high season), reemplazo temporal di un trahador, ehecucion di un proyecto temporal, y si ta trata di trabounan los/no structura.

GOBIERNO KIER CAMBIO

Problema segun Hubert Dirksz, presidente di FTA ta, cu gobierno kier cambia esaki y crea e posibilidad cu pa tur circumstancia, por tuma hende a base di contract di trabou defini, cu ta pone cu e trahador no tin un siguransa di trabou, y no por bira ‘vast’. Den e caso aki, e trahadornan por haya maximo tres contract di p.e 8 luna, despues di cual e dunador di trabou cada fin di contract por evalua si e trahador por sigui cu e contract of por termina esaki.

SKINA DI GREMIO COMERCIAL

Dirksz a confirma tambe cu ta for di skina di gremionan comercial e grito ta bin, particularmente WAB (contratista den sector di construccion) for di aña pasa. A haci cierto concesion, pero no den forma di un ley, pasobra e ta algo cu ta regarda tur trahador y no e grupo specifico aki.

SIGURA TRABOU

Un problema cu sindicato FTA tin ta cu e trahador cu tin un contract di trabou pa defini de hecho nunca no por sigura su mes financieramente pa medio di un prestamo na banco, hipoteca, of algo otro cu banco ta exigi un periodo mas largo di trabou.

REACCION DI GOBIERNO

Gobierno ta wak e asunto otro, y cu esaki ta pa un grupo specifico, manera 50plussers, y hobenannan cu mester di un trabou pa un periodo, sin cu e ta mara e dunador di trabou cu despues di 2 luna, e persona mester keda. Segun minister encarga di labor Paul Croes, e no por kere cu un dunador di trabou lo actua cu mente maligno y cu tin e mente cu kier kita trahador facil. E ta mira cu e si un trahador ta bon, dificilmente e dunador di trabou ta bay lag'e bay. Pues minister ta wak e asunto aki cu un diferente wowo, y no ta mira e problema den e asunto aki. Segun Croes, e cambio aki ta duna e dos ‘doelgroepen’ e chens pa tambe integra den nos sector laboral. Y asina ta duna posibilidad pa mas hende por haya un trabou y cu esaki mester por cu e cambio di ley.