Banconan kier pa frustra intento di hacking na Aruba

ORANJESTAD – Banconan den intento pa frustra e problema di hacking, ta cla pa inicia un campaña pa logra esaki. E intencion ta pa por medio di tips, mustra clientenan bancario kico mester haci pa por frustra e persona cu intento maligno cu kier hack nan cuenta bancario. Presidente di e acusacion di banconan na Aruba, Pierre Rafini ta confirma na NoticiaCla.com cu hacking ta e preocupacion number uno di nan riba nan lista di preocupacion. Y como tal nan kier percura pa esaki no ta un problema mas.

HACKING

Hacking ta e problema cibernetico unda cu un persona pa medio di un computer, ta drenta un computer di un persona den un forma no desea, cu e fin pa crea problema. Un persona cu ta usando un computer, tablet of telefon via internet, ta haci su mes hopi biaha vulnerable na tipo di practica asina. Y ta netamente e tipnan cu e asociacion bancario lo presenta, tin cu alerta e clientenan di e forma con pa ‘combati’ e problema aki. Ora cu e clientenan aki inocentemente subi cierto websitenan, nan ta habri nan mes pa e hacker (e ladron cibernetico) pa drenta den e computer di e cliente inocente. E hacker ta plantea un virus den e computer, cu na su disposicion por drenta den e cuenta bancario di e usuario, y haci e daño na e cliente.

CASO ARUBUS

E caso mas recien grandi raporta, ta esun unda cu hacker nan a logra drenta e cuenta di Arubus, y a purba kita un suma grandi for di e cuenta. Actuacion lihe di e banco y polis, a pone cu a logra pone man riba e cuenta na tempo y sigura gran parti di e placa aki. E ladron(nan) mes, sinembargo ta cana liber ainda. Pierre Rafini ta papia di tips con pa evita hacking aki.