Ex gobernador deteni Manuel Rosales lo presenta dilanti tribunal

CARACAS – Despues cu funcionario di e Servicio Bolivariano de Inteligencia Nacional (Sebin) a detene ex gobernador Manuel Rosales na yegada di su avion ayera for di Aruba, e tin cu presenta dilanti un tribunal. Ta trata di e tribunal 19 di Control di e Área Metropolitana di Caracas (AMC). Tabata na porta di avion, (foto cortesia Diario la Verdad) cu e funcionarionan di Sebin a pone man riba dje. E momento ey tabata presente e fiscal nacional cu competencia di proteccion di derecho fundamental, Lucy Fernández, y un docter forensico. Esey tabata necesario pa garantisa tur momento ‘e respet di derecho humano di cualkier detenido’, e portal nacional di informacion di gobierno VTV a sigura.  

CARGONAN CONTRA ROSALES

E detencion ta basa riba un cargo di 11 di december 2008, unda cu e lo ta acusa di delito di enrikesemento ilicito, despues di un investigacion haci riba su persona, for di tempo cu Rosales tabata gobernador di estado di Zulia entre 2002 y 2004. Na maart 2009 el a keda acusa y tabatin un orden di aresto. E no a asisti na un audiencia preliminar ya cu el a bandona e pais y a busca asilo politico na Peru e tempo ey.

YEGADA VENEZUELA

Apenas cu e opositor politico Venezolano Manuel Rosales a baha for di avion na Venezuela awe tardi, oficialnan di SEBIN (servicio bolivariano de inteligencia) a deten'e. Asina e partner di NoticiaCla.com na Venezuela, El Nacional, a raporta. E avion comercial di Laser tabata procedente di Aruba, y tabatin fuera di e politico abordo, un cantidad di persona di su partido y abogado. Despues di su detencion, a transporte den un avion diferente pa Caracas. 

DETENCION

Segun un miembro consehero, Diego Sharifker, -cu tambe tabata abordo-, asina cu e avion a para, ‘e efectivonan di seguridad a rondona e avion prome cu e ex gobernador a baha di avion’. “Ainda nos ta den avion. Nan no a habri e porta. Nos ta rondona pa PoliZulia y GNB (Guardia Nacional). Ya Manuel ta bahando di e avion. E comision di SEBIN ta na e porta di avion y nan a hiba Manuel caba”, Scharifker a declara.

REPASANDO SU MOMENTONAN

Algun ora prome, e politico y ex gobernador a declara di ta contento di por ta bolbiendo Venezuela. Paso a paso e tabata relata su pasonan for di Aruba, segun cu e tabata na aeropuerto. For di momento cu el a ricibi su boarding pass, te ora cu el a subi e avion. “Ya mi tin mi boarding pass. Mi ta bayendo mi tera stima” el a pone riba su pagina di Facebook. Mas despues el a pone potret cu su fanaticada di Aruba na aeropuerto. "Mi ta cu hopi Venezolano na aeropuerto. Ta sinti e speransa y e fe cu dia 6D (6 di december) nos ta bay gana”. Tambe ora el a subi e avion, “Mi tin un conopi na mi garganta y mi curason ta bati. Rumbo pa mi tera bunita”. Y ya ora cu e tabata yegando, un potret mas for di halto.

SU JORNADA

Conciente cu e lo por keda deteni na su yegada, dirigente opositor Venezolano Manuel Rosales a biaha awe merdia pa Venezuela. Segun e portal noticiaaldia.com, el a yega Aruba diamars atardi for di Panama, y lo mester a biaha awe merdia cu avion priva pa e estado di Zulia. “Mi ta conciente di e situacion pero mi tin cu bolbe mi pais” Rosales a bisa na e portal. Rosales tabata den exilo na Peru pa varios aña, despues cu tabatin un orden di aresto p'e, prepara for di tempo di presidente Hugo Chavez. A resulta cu el a biaha cu avion comercial di  e aeroliña Laser Airlines. 

ARUBA DEN NOTICIA

Cu e noticia aki, Aruba su nomber a ‘skeiro’ rond mundo atrobe e ultimo dos dianan, y specialmente riba rednan Latino. Tur a cubri su yegada pa Aruba y su pasonan riba nos isla. Asina a bira conoci cu Rosales, -ex gobernador y ex candidato presidencial venezolano-, a yega Aruba for di diamars atardi 4’or for di Panama, riba buelo di Aruba Airlines. Durante su estadia na Aruba, e la papia cu varios medionan di prensa internacional, mayoria di nan via Skype of telefon. NoticiaCla.com tin confirmacion cu representantenan di CNN en español, a biaha pa Aruba for di Venezuela y a yega nos isla diaranson. Den curso di dia, nan tambe a haci nan entrevista cu e dirigente opositor.

BRINGA FOR DI VENEZUELA

Segun Rosales, e tin cu bolbe pa por bringa e chavismo for di Venezuela. E mester ta ‘e ehempel’ den e lucha aki. E ta hopi conciente cu su regreso por nifica su fin di libertad, pero e ta dispuesto pa risca esaki.

BIAHE PA VENEZUELA 

E ex gobernador di Zulia, a sali pues cu avion pa aeropuerto internacional “La Chinita” unda cu e lo a keda ricibi pa miembronan di su partido UNT (Un Nuevo Tiempo). For di gobierno, e fiscal general di e pais Luisa Ortenga a bisa cu si Rosales bolbe Venezuela, e lo wordo wordo deteni mesora y lo garantisa su tur su derechonan. “ E ta un Venezolano, esaki ta su pais, y lo respeta tur su derechonan si ta berdad cu e ta bolbe", Ortenga a bisa den un entrevista cu Televen.