Riu Palace Antillas a Celebra su Prome Aniversario

ORANJESTAD - Riu Palace Antillas a celebra su prome aniversario riba diadomingo, 11 di october, cu un anochi special di cuminda, musica y entretenimento. E hotel a ricibi VIPnan for di rond di mundo, incluyendo invitadonan special for di Inglatera, Escocia, Alemania, Spaña, Hulanda, Brazil, Colombia y Argentina. Gerente General Juan Blanco, Gerente di Benta Shari Sield y otro miembronan di e ekipo di RIU Palace Antillas tabata presente pa asina celebra e ocasion special aki hunto cu e huespednan di RIU, famia y amigonan. E Riu Palace Antillas Hotel a habri su portanan pa prome biaha riba dia 11 di october, 2014. Situa riba e playa di Palm Beach, Aruba, e resort ta ofrece e ambiente Caribense di mas selectivo. Su servicio all-inclusive solamente pa adulto ta ideal pa esnan cu ta buscando un experiencia exlusivo di vakantie unda nan por relaha y sosega den un di e luganan mas trankilo y romantico riba e isla.Tocante RIU: E cadena internacional di RIU a wordo funda na Mallorca pa famia Riu na 1953 como un compania chikito di vakantie y awendia ainda ta e propiedad di e famia su di tres generacion. E compania ta specialisa den resortnan di vakantie y mas di 70% di su establecimentonan ta ofrece su servicio aclama di 'All Inclusive by RIU'. Cu e inauguracion di su prome hotel di ciudad na 2010, RIU ta expandiendo su variedad di producto cu su mesun liña di hotel di ciudad conoci como Riu Plaza. RIU Hotels & Resorts awo tin mas di 100 hotel na 19 pais cu ta yama bon bini na mas di 4 miyon huesped pa anja y ta provee trabou pa un total di 27,813 empleado. RIU actualmente ta evalua como e di 30 miho cadena na mundo, un di esunnan mas popular den Caribe, esun mas grandi na Spaña pa loke ta ganashi y e di tres mas grandi pa loke ta cantidad di camber.