Directiva nobo di Kiwanis Club of Young Professionals Aruba a wordo instala

ORANJESTAD - Recientemente den ballroom di Holiday Inn Hotel Aruba a tuma lugar e anochi di instalacion di e directiva nobo di Kiwanis Club of Young Professionals Aruba (KYPA). E directiva lo tin bou di su encargo e aña kiwanistico 2015 / 2016.

E directiva nobo ta wordo lidera pa Sr.Brian Croes como presidente. Otronan cu tambe ta forma parti di e directiva ta Thayanne Lee como secretaria, Randy Croes como tesorero, Bryan Nemecek como proximo presidente pa 2016/2017, Cindy Wernet como vice presidente y Rendell de Kort como Presidente saliente. Pa loke ta e directornan esaki ta wordo forma pa Taino Heinze director Recruiment & Retention, Mark-Benson Denz director Public Relations, Lativa Maduro director Fundraising Committee, Sherellise Ras director Youth & Community Services y Zanette Refunjol director of Education Committee.

Durante e discurso di e presidente nobo e la indica cu e club a logra cosnan hopi positivo durante e ultimo 5 añanan. E club a yuda hopi grupo por medio di voluntarismo. E boluntad y forsa cu e equipo di KYPA a demonstra tabata hopi grandi. Tambe a traha duro pa crea un relacion cu nos comunidad. E aña kiwanistico aki Sr. Croes kier pa tur miembro sigui traha duro como un solo ekipo pa por sigui fortifica e relacion cu KYPA tin cu nos comunidad. Naturalmente e parti di actividad recreativo di forma parti di un ekipo no lo hasi falta.

E anochi di instalacion tabata un anochi hopi ameno cu a conta cu presencia di entre otro e incoming Luitenant Governor Mrs. Roselyne Leon y e Luitenant Governor saliente Mr. Gabo Mansur. Tambe por a mira diferente miembro di e famia di Kiwanis y otro clubnan di servicio. Na final di e anochi e banda Mini Duro a sa di pone a invitadonan riba pista di baile pa sera e anochi den forma inolvidabel.

Kiwanis Club of Young Professionals Aruba ta un club hopi activo yudando comunidad den diferente forma. Durante henter aña Kiwanis Young Professionals Aruba, mihor conoci como KYPA ta organisa diferente proyecto como tambe eventonan pa recauda fondo. E club ta consisti ta professionalnan hoben cu tin e ambicion y curason pa traha pa comunidad. KYPA a yuda diferente fundacion den pasado, manera Favi, Fada, Casa Cuna pa menciona algun. E club ta enfoca hopi riba bienestar di nos muchanan y tambe ta haci ‘Service projects’ y asina ta yuda diferente grupo den nos comunidad.