Croes: A logra reduci pago di onderstand cu 3 miyon florin

ORANJESTAD - Awe na october 2015 tin 319 persona menos ta cobrando onderstand na Aruba. Minister di asuntonan social Paul Croes a recorda cu pa inicio januari 2014 di e proyecto Ban Traha, - proyecto cu ta re-integra personanan den bijstand of onderstand bek riba e mercado labor-, tabatin 2910 famia cu tabata cobra onderstand. Mas di 250 di esakinan a logra wordo re-integra na trabou.

REDUCCION TRADUCI DEN CIFRA

E reduccion menciona, ta significa un reduccion di mas di 3 miyon florin di e suma cu ta bai na bijstand", Croes a anuncia. Segun e mandatario, e proyecto Ban Traha siguramente ta demostra di ta cosechando exito. E proyecto aki ta stimula hendenan cu ta den bijstand y por y kier traha, pa yega na un empleo. Un acuerdo di cooperacion entre Departamento di Asuntonan Social y Departamento di Labor a wordo fortifica por medio di un protocol. Esnan cu a recibi un empleo, awor tin un salario cu ta bai bek den nos economia. Tambe ta personanan cu ta contribui por medio di loonbelasting bek na caha di gobierno. Por bisa tambe cu e personanan aki ta mira perspectiva nobo pa asina desaroya nan potencialnan.