Crisis constitucional na caminda na St Maarten

PHILLIPSBURG – E caida di e gabinete Gumbs na St Maarten, ta menasa di bira un crisis constitucional segun NOS ta raporta. E gobierno nobo di William Marlin, no por cuminsa ‘traha’, pasobra e gobierno ‘bieu' di premier Marcel Gumbs, ta nenga di retira.

BLOKEO DEN CIUDAD

Diamars mainta ainda trucknan grandi yena cu material pisa, a blokia caminda pa e oficina di gobierno, unda cu gabinete ta goberna. E trucknan aki a keda busca pa e mayoria nobo den parlamento. Segun nan, Gumbs tin e pais politicamente secuestra y mester retira mesora. 

E CRISIS

E crisis a cuminsa ora cu fin di september ultimo, tres parlamentario a ‘bula cura’ y uni cu oposicion. Mesora despues nan a entrega un mocion di desconfiansa, cu a wordo acepta. E mesun anochi e mayoria nobo a firma un acuerdo di gobernacion nobo, y a manda esaki pa gobernador. Gumbs tabata den exterior e momento ey. Ora cu el a bolbe, e la manda un concepto di ley pa gobernador, den cual e ta desolve e parlamento y yama eleccion nobo. Gumbs ta nenga retira, tanten gobernador no firma e ley nobo aki.

HULANDA

Segun hopi experto hulandes, gobernador ta actuando ilegal cu e tardansa pa firma. Segun e expertonan, gobernador ta obliga pa firma e ley, of mand'e pa destruccion na Conseho di minister di Reino na Den Haag. Segun NOS, no ta conoci ki tarea Hulanda ta hungando ‘den backround.’. Plasterk a declara siman pasa ainda di kier tene un distancia un rato riba e desaroyo politico di e isla.

GOBERNADOR

E wardamento awor ta riba gobernador. Segun huristanan, e no por haci otro cu firma e ley cu Gumbs a presenta p'e. St Maarten por prepara su mes e ora pa un eleccion na december proximo. Fuente: Dick Drayer/NOS

.