Mas scol cerando conoci cu capacidad di cachonan policial local

ORANJESTAD – Mas y mas scolnan ta hayando un idea kico ta e capacidad di polisnan na Aruba y specialmente e departamento canino (cacho) policial. Siman pasa e Unidad K9 di Cuerpo Policial a haci un bishita y un presentacion impactante na Sonrisa, unda cu clientenan di e centro a keda encanta cu e cachonan y tur loke e cachonan por haci. Dirk Lemmens, trainer di Belgica cu tabata na Aruba pa duna un curso special di un siman, a compaña e team cu a duna e presentacion.

DIA FANTASTICO

Lemmens a expresa durante di e presentacion cu “den cinco minuut nan tabatin mi curason”, referiendo na e hobennan entusiasma. E trainer a priminti cu e lo bay haci algo pa e hobennan di Sonrisa na Belgica, e no tabata sa ainda kico, pero lo mester bay brainstorm y lo haci algo sigur pa nan. “Awe tabata un dia fantastico,” Lemmens a agrega.

PAK PA TRAIN

E hobennan a hasta haya bisti e paknan pisa cu e trainernan ta bisti pa nan no wordo mordi den entrenamento. Asina nan tambe a sinti un poco con e ta pa traha cu e cachonan.

NOMBER PA PUPPY NOBO

Un detaye hopi special tabata ora cu Dick Lemmens a pidi nan pa yud’e scoge un nomber pa su puppy nobo, cu e lo ricibi na januari 2016. El a splica cu na Belgica tur cacho di rasa, no importa cua rasa, cu tin un “stamboom” y nace den un cierto aña ta ricibi un nomber cu ta cuminsa cu e letter cu a wordo scogi pa e aña ey. Na 2016, esaki ta e letter “P”.

MOTIBO CU SCOLNAN TA PIDI E PRESENTACION

E scolnan hopi biaha ta combina e presentacionnan cu un sportdag of otro actividad. Tambe e Unidad di K9 ta duna diferente presentacion na gruponan di padvinder y camping durante di vakantie. E shownan aki ta un di e cosnan cu K9 ta haci pa laga publico general cera conoci cu nan y nan trabao y tambe ta pa trece Cuerpo Policial mas cerca di comunidad.