Polisnan cu reconocemento pa a rescata piscadornan perdi

ORANJESTAD – E polisnan maritimo envolvi den e rescate di algun piscado siman pasa, a haya un reconocemento special e siman aki. Esey ta pasobra danki na actuacion liher, a logra rescata e personanan perdi aki. Alto Comisario mr. Adolfo “Dolfi” Richardson a bisa, cu pa e caso specifico aki, pero pa hopi mas esfuersonan diario di e team di Maritieme Politie, el a dicidi di yama nan aden y entrega na esunnan envolvi den e rescate un reconocimento y percura pa comparti cu comunidad con orguyoso top di Cuerpo Policial ta cu e trabou di e team aki.

E MELDING

Ora cu e melding a drenta for di Centrale Post cu via di Warda di San Nicolas a yega informacion cu lo tin piscadornan perdi riba lama, Brigadier Davidson Eduards y su coleganan di biaha a bay den accion. E nomber di e boto envolvi a zona conoci y nan a corda riba un boto cu nan a touw yuda bolbe bek tera un siman prome. E boto tabatin problema cu motor y Eduards a saca su potret y Maritieme Politie tabatin datonan di e persona envolvi.

E OPERACION

Di biaha Eduards a check su telefon pa detayenan riba e potret, e color di e boto, registracion, e piscadonan cu tabatin abordo ora cu nan a touw e boto, etc. Hunto cu su colega a compila tur informacion extra cu nan tabatin, incluyendo unda nan a topa cu e boto den problema e siman prome, y a comparti esaki cu tur nan contactonan pa cu casonan di rescate. Pa e accion rapido y determina y e atencion extra cu Maritieme Politie ta duna na detayenan ora di haci nan trabou, a logra rescata e personanan perdi.

HOPI BON TRABOU

Richardson a splica cu un di e directornan di Kustwacht a comenta na dje, na momento di e rescate, cu su hendenan a haci hopi bon trabou. Esaki tabata un momento di orguyo sigur pa e chef. Pa sa cu ta door di e perseverancia di busca y provee informacion asina valioso di parti di Maritieme Politie a logra di salba bida di e piscadonan y pa esaki ricibi un pluimpje di un instancia pafo di Polis, ta algo hopi valioso.