Dos pagina calendar Cops & Dogs dedica na Aruba

ORANJESTAD - Pa e di 10 aniversario di e kalender di teamnan K9 “Cops & Dogs”, fotografo John Baer y e team di Cops & Dogs Police K9 Calendar a biaha pa Aruba pa un photoshoot cu miembronan di Cuerpo Policial y nan parternan canino. E resultado final ta dos potret impactante di miembronan di K9 Aruba cu scenarionan di nos isla den e kalender di aña 2016. Richard Kramers, coordinador di e Unidad K9 di Cuerpo Policial Aruba, ta splica cu algun luna pasa el a wordo acerca pa John Baer pa un photoshoot y a pesar cu e photoshoot no ta un garantia cu nan lo logra un luga den kalender, nan a haci’e cu hopi gusto. E fotografo ta biaha varios parti di mundo pa saca e potretnan pa e kalender y e aña aki tabata prome biaha cu nan a bishita Aruba. Na luna di augustus Kramers a ricibi e bon noticia cu Aruba a ricibi no uno, pero dos “spot” den e kalender, esta februari y november. Siman pasa, John Baer tabata na Aruba pa entrega un copia di e kalender na Alto Comisario Adolfo “Dolfi” Richardson y a laga algun kalender cu Richard Kramers pa clientenan na Aruba. John Baer a splica cu henter e proceso a tuma mas of menos cuater ora y el a saca potret di varios cacho cu diferente scenario. E fotografo a expresa su satisfaccion cu con e photoshoot a bay, con facil e tabata pa traha cu K9 Aruba y e opcionnan cu e tabatin pa traha cu ne pa loke ta scenario. El a menciona cu particularmente e foto di februari, unda cu por wak e bunita colornan, un boto y e lama, ta mustra e bunitesa di Aruba tambe. Baer a splica cu 2016 ta un “milestone” pa e kalender, y “Cops & Dogs” ta e unico kalender cu a sali 10 aña largo sin salta niun aña. E meta principal di e kalender ta pa recauda fondo pa cumpra materialnan pa e cachonan, pues e fondonan ta bay bek na bon uzo pa e cachonan; e material principal ta “bullet proof vests”. Cops and Dogs a traha den pasado cu entre otro Kevlar for Canines y Capital Canines, cu ta organisacionnan cu ta provee vestnan anti-bala pa cachonan militar y di Polis. Baer a agrega cu no tur ora unidadnan K9 ta ricibi e financiamento cu nan mester y den hopi pais rond mundo por wak cu e agentenan policial si tin vest, pero e cachonan no y Cops & Dogs ta yuda den e adkisicion di e vestnan pa e cachonan. E kalender pa obtenibel via di Unidad K9 di Aruba, como tambe “online” via di www.copsanddogs.com. E proyecto tin tambe un pagina riba Facebook, esta Police K9 Calendar “Cops & Dogs”.