Figaroa: Waf na Playa lo habri pa pueblo atrobe pronto

ORANJESTAD – Arubianonan dentro di poco, -despues di 40 aña-, por cana riba waf di nan centro di ciudad Oranjestad atrobe. Esey ta ora cu mas di mitar di e 200.000 meter cuadra di e waf ta wordo habri pa comunidad.

TERENO SPECIAL

Ta trata primordialmente di e tereno cu awor ta den man di APA y cu unda anteriormente tabatin warehousenan cu tabata forma parti di e asina yama Zona Franca. Nan aworaki a wordo benta abou y ta spera cu e aña aki ainda APA por otorga e parcelanan aki pa desaroyonan nobo. Segun director di APA, Jossy Figaroa, e ta papia di un centro financiero y di conocemento, apartamento, oficina, pero sigur un tereno cu ta habri pa publico.

NO CENTRO COMERCIAL

Tin hopi interes di exterior tambe. APA ta hayando sigur hopi oferta pa cadenanan di tienda grandi. Pero esey lo no sosode. Gobierno no kier pa e waf competi cu e centro di ciudad recientemente vitalisa y unda cu a inverti miyones pa haci esaki mas bunita y atractivo.

CUIDAO CU VENEZOLANONAN

E autoridad di haf ta prefera pa e desaroyo ey keda den man di inversionistanan local. Esaki pasobra parse cu tin hopi interes for di Venezuela. “Nos mester tene cuidao pa no atrae Venezolano so aki. Nos ta haya cu Arubianonan tambe mester por haya pida tereno” Figaroa ta sigui bisa.

NOSTALGIA

Loke cu haf di Oranjestad mester bira atrobe, ta un lugar di sali. Manera cu e tabata den añanan 70 prome cu a ser'e. “E nostalgia, heimwee pa landa den laman di haf, ta biba ainda” Figaroa ta bisa.

Di Caribisch Netwerk. Autor : Sharina Henriquez foto: Sharina Henriquez