Venezolanonan illegal no ta bin Aruba cu boto mas sino avion

ORANJESTAD — Venezolanonan cu ta bin Aruba ilegal pa medio di boto y cu ta sali for di e peninsula di Paraguana, ta haci esaki menos, y ta opta mas y mas pa biaha awor cu buelonan comercial. Esaki ta segun Igmar Benschop di polis maritimo. Asina partner di NoticiaCla.com, esta Caribisch Netwerk ta raporta.

COMPARACION CU PROME

“Compara cu antes, nos ta haya menos caso di botonan cu ta yega tera” Benschop ta bisa. “Antes no tabata piki sigur un boto pa luna. Awe nan ta bin cu avion. Esnan cu si ta bin cu boto, hopi biaha ta esnan cu a bin Aruba caba den pasado, y cu a wordo deporta, of cu ta bin nos isla cu arma y droga” e hefe di polis maritimo ta bisa.

BOTO PISCADO

Benschop a splica cu e botonan ta sali for di e wafnan manera Puerto Escondido, Las Piedras y Adicora na e peninsula di Paraguana. E biahe di casi 20 kilometer ta tuma lugar anochi, y ta trata di entre 5 pa 10 pasahero cu ta yega Aruba. E botonan di piscado cu normalmente no ta mas grandi cu 6 meer, ta yega tera na esun di Santana di Cacho tras di Baby Beach. “Hopi di e botonan aki ta esnan cu wordo raporta como horta, y ta pone cu nos tin cu debolbe e boto(nan) na esnan cu a haci e denuncia di e perdida” Benschop a sigui bisa. Hopi di e botonan ta yega net dilanti costa, y e pasaheronan tin cu landa bin tera. Ey ta unda cu varios morto a cay tambe. Sigur den e areanan cu tin hopi coriente di laman.

CIFRA DI GUARDA COSTA

For di cifra di Guarda Costa, ta resulta cu na 2012 a gara 20 persona cu a purba yega Aruba via boto di piscado. Na 2013, esey a aumenta te na 34. Aña pasa Guarda Costa y polis maritimo a logra detene apenas 2 naufrago ilegal di Venezuela. E aña aki, te cu september a logra gara 12 persona.

DOS MIL PERSONA

E cantidad di persona cu polis maritimo y guarda costa ta raporta como esnan cu ta drenta Aruba, ta den contraste fuerte cu e cantidad cu ta yega Aruba via aeropuerto. Director di imigracion Gerald Vingal, (manera cu NoticiaCla.com a raporta caba) a mustra cu hopi Venezolano ta keda Aruba mas largo cu e permiso di 30 dia. Tambe tin bishitante di Venezuela cu ta bin cu un pasashi di transito pa otro destinacion, pero no ta haci uzo di esaki. Entre 2000 venezolano ta keda Aruba mas largo cu nan ta permiti. Mester investiga ainda cuanto di e personanan aki a haci un peticion pa permiso di estadia, ta kedando ilegal, ta trahando ilegal, of a wordo deporta.

ALGO TEMPORAL

Pero no ta tur hende ta precupa. Asdrubal Batista, ta un di e economistanan mas prominente di Venezuela. Durante un bishita recien na e isla, e la indica cu e influx actual di venezolano, cu ta bin Aruba cu un entrada abou y cu e meta pa raspa dollars, ta algo temporal. Tin un momento cu gobierno lo prohibi nan di esaki y lo dificulta nan esaki. Cu tin Venezolano rico cu ultimo tempo ta cumprando hopi propiedad y compania riba nos isla, ta algo cu ta andando basta tempo caba.

CRISIS DI REFUGIADO

Baptista no ta precupa pa un crisis di refugiado venezolano. “E pais lo ta suficiente grandi y rico pa por abastece tur hende di suficiente materia basico, pa nan no mester huy den cantidad grandi."

Di Caribisch Netwerk   Autor : Ariën Rasmijn foto: Ariën Rasmijn.