Revista Playboy ta deshaci di potret di muhernan sunu

LOS ANGELES – E ta fin di un era. Playboy, e revista famoso pa su potretnan di damanan sunu, lo stop di publica potretnan sunu. E motibo principal? Internet ta yen di potret y acceso na pornografia caba. Playboy lo sigui pone potretnan cu ta mas ‘decente’ y cu mucha di 13 aña, bou supervision, tambe por mira. Pero nada di muher completamente sunu mas.

EDICION DIGITAL

Interesante pa sa ta cu pa varios luna, e edicion digital, esta Playboy.com ya ta sin potretnan sunu. E compania a realisa algun tempo pasa caba cu e no por a competi cu e mundo pornografico, ni con grandi y poderoso e nomber Playboy ta. “Bo tin acceso facil cu un click, pa cualkier tipo di acto sexual y muher sunu” e CEO di e compania Scott Flanders a bisa.

EVOLUCION

Como tal e coneu, e bunny, mester evoluciona. E benta di e revista tambe a cay hopi. For di 5.6 miyon bendi den su bon tempo di añanan 70 y 80, e la baha te na 800 mil ehemplar bendi. E website tambe tabatin problema pa bende cu e potretnan di muhernan sunu. Interesante detaye ta cu ora cu a cambia e forma, esta di no pone muher sunu mas, e edad di e lesado a baha di 47 te na 30 aña y e trafico di internet a aumenta di 4 miyon usuario te na 16 miyon. E compania ta sigui gana placa na licencia cu e ta genera rond mundo. Tur caminda cu tin e logo, hende tin cu paga y esey si ta bayendo bon ainda. “Nos lo tin muher bunita ainda, pero awor nan lo tin paña bisti."