Comision Spies desapunta cu evaluacion islanan BES riba 10-10-10

DEN HAAG – E islanan BES ta mas pober cu ora cu nan a drenta den e constelacion nobo na 2010. Esaki ta e conclusion di un comision cu a evalua e situacion 5 aña despues. Ademas segun Comision Spies, Boneiro, Saba y Sint Eustatius no ta probecha suficientemente di e integracion cu Hulanda. Tanto bou di e poblacion, como serca e otro hendenan envolvi, desapunto ta reina. Esaki ta opinion di e comision di evaluacion bou di mando di Liesbeth Spies, cu e siman aki na Den Haag a presenta e resultadonan di e investigacion di evaluacion.

CONSULTACION

Consultacion di e islanan, cu por duna nan propio contribucion na legislacion nobo, segun Spies ‘no tabata exitoso’. “Ministerionan formalmente a ofrece e islanan e oportunidad di consultacion. Pero den practica esaki no, of casi no, a tuma luga.”

REGULACION SIN TIN NODI

Diputado Chris Johnson (Saba) tocante regulacion sin tin nodi: “Segun legislacion hulandes ta ilegal pa warda awa. Esaki lo kiermen cu tur cas na Saba ta operando ilegalmente." Johnson ta referi na e wardamento di awa cu na Saba ta normal. “Of tuma e controlnan di haf na Saba. Nos tin un haf chikito, e barconan cu yega ta bai di un haf grandi pa un otro. No tin niun sentido pa controla barco den un haf chikito.”

COMISION EVALUACION

E comision di evaluacion ta menta e mehoracionnan den cuido y enseñansa como logro. Segun e comision esaki ta pasobra e palabracionnan ta cla y tur dos partido ta interpreta nan mescos. E claridad aki hopi biaha ta loke falta, e comision ta bisa.

TRATO FRAGMENTA

E comision ta masha malcontento tocante e cantidad di ministerio cu tin algo di bisa na e islanan. Spies: “E maneho y su financiamento ta fragmenta y e conocemento di circumstancianan specifico na islanan BES hopi biaha ta limita.”

NIVEL DI PROSPERIDAD

E nivel di prosperidad na islanan BES a baha for di 10-10-’10. Hende cu ta traha tambe a bai atras. Segun e miembro di comision Frans Weekers esaki no necesariamente ta falta di e structura nobo. “Partinan grandi di mundo ultimo añanan a pasa den un perdida grandi di prosperidad.” Den e raport tin critica tambe riba gobiernonan local. Loke entre otro ta falta ta suficiente control democratico di conseho insular.

EVALUACION

Cinco aña pasa a stipula cu lo evalua e reformacionnan. A investiga legislacion, structura di gobierno y e consecuencianan pa pueblo. Comision-Spies no ta duna recomendacion.

Ret Caribense Autor Pieter Hofmann foto Pieter Hofmann