Mayan ta ‘Dia Mundial di Laba Man’

ORANJESTAD - “Global Handwashing Day” ta un dia cu ta wordo celebra anualmente riba 15 di october. E ‘Dia Mundial di Laba Man’ a keda funda pa e “Global Public-Private Partnership for Handwashing” y e ta un oportunidad pa diseña, test y traha formanan creativo pa anima comunidad pa laba nan man cu habon.

CONCIENTISA RIBA IMPORTANCIA DI LABA MAN

E ta un dia di promocion mundial dedica na conscientisa riba e importancia di laba man cu habon como un manera efectivo y economico pa preveni malesa y pa salba bida.

PAKICO E TA DISEÑA

E ‘Dia Mundial di Laba Man’ ta diseña pa encurasha y apoya un cultura global y local di labamento di man cu habon, haci publico e situacion di labamento di man rond mundo, concientisa riba e beneficionan di labamento di man cu habon.

HISTORIA RIBA E CELEBRACION AKI

E prome ‘Dia Mundial di Laba Man’ a wordo celebra na aña 2008, ora cu mas di 120 miyon di mucha rond mundo a laba man cu habon den mas di 70 pais. Desde e aña ey, comunidad y lidernan nacional a uza e ‘Dia Mundial di Laba Man’ pa comparti mensahe di e importancia cu labamento di man tin; construi labamano y demostra con facil y rapido ta pa laba man y specialmente e balor di tin mannan limpi. Cada aña riba e fecha mas di 200 miyon di hende den mas di 100 pais rond mundo, ta participa na e celebracion.

APROBACION DI GOBIERNONAN

E ‘Dia Mundial di Laba Man’ tin aprobacion di gobiernonan, institucionnan internacional, organisacionnan social di comunidad, organisacionnan no-gubernamental y tambe empresanan priva y particular. Instituto Biba Saludabel y Activo, IBiSA ta observa e dia aki y ta comparti tur informacion riba e importancia cu labamento di nos mannan tin pa salud y higiena den nos comunidad di Aruba.