E di 10 edicion di Shoco Awards ta fin di november

ORANJESTAD - E di 10 edicion di Shoco Awards ta tuma luga dia 29 di november 2015 den Renaissance Convention Center. Durante un rueda di prensa diamars mainta, consehero di Minister di Turismo, Marisol Sanchez-Maldonado, a splica un poco mas di Shoco Awards, unda inicialmente e tabata un premiacion pa esunnan cu tabata resorta bou di AHATA solamente.

AWOR SHOCO TA UN PREMIO NACIONAL

Na 2010 a intermedia pa trece cambio na esaki y na 2011 tur cu ta traha directamente of indirectamente cu turismo na nivel nacional por aplica pa ta nominado di Shoco Awards. Na 2013 a crea e Shoco Awards Foundation. Marisol Sanchez-Maldonado ta splica: " Esaki ta netamente lo cual nos tabata boga p'e. Entre mas sosten por haya di empresanan, mas grandi nos por haci e evento cu ta premia esunnan cu ta duna servicio di excelencia y ta haci di Aruba e isla mundialmente reconoci cu nos ta awendia pa e calidad di servicio cu nos bishitantenan ta ricibi." Cada persona den e industria aki, cu tur dia ta duna e miho di nan mes pa hiba Aruba dilanti, merece di wordo reconoci y ta p'esey e aplicacion pa Shoco Awards ta pa tur hende trahando directamente of indirectamente pa nos industria turistico.

CATEGORIANAN DI SHOCO

Representante di AHATA, Vanessa Rasmussen a splica di e diferente categorianan di premiacion cu Shoco Awards lo tin manera ta employee of the year, supervisor of the year, manager of the year, young tourism profesional of the year, lifetime achievement award, tour guide of the year, one happy island embassador y student of the year. Vanessa Rasmussen ta bisa: "No tin niun costo di registracion pa aplica. Nos kier encurasha tur empresa no ta importa si ta chikito of grandi pa nomina e trahadonan cu atraves di nan servicio optimal, cu un sonrisa riba nan cara y e atencion inigualabel, ta haci e diferencia den boso negoshi. Si ainda bo no a manda un aplicacion y bo ta interesa di haci esaki, e ultimo fecha pa aplica lo ta diahuebs awor dia 15 di october 2015 na oficina di AHATA." Despues di e ultimo fecha pa aplica, e huradonan lo cuminsa cu nan trabou pa asina for di e nominadonan, nan saca un ganado den cada categoria. E anochi di premiacion lo ta un evento di gala, caminda tur e nominadonan lo wordo honra pa nan trabou y dedicacion, y e ganadonan di cada categoria lo ricibi nan Shoco. Manera ta conoci pa e ultimo añanan, e evento aki lo wordo televisa. Pa mas informacion y detaye di documentonan necesario hunto cu e aplicacion, por contact Vanessa Rasmussen na 5822607 of via email na vanessa@ahata.com.