Fundacion MUSICA cu raport financiero pa su musiconan

ORANJESTAD - Stichting MUSICA a tene un reunion cu musiconan na unda a presenta nan Financieel Rapport. Compania renombra administrativo PLUS ACCOUNTANT tambe tabata presente Sr. Croes propietario y Registered Accountant a presenta y duna un splicacion amplio na tur musico encuanto esaki.

INVITADO SPECIAL

Invitado special di e anochi aki, tabata presente Presidente di AMAC, Sr. Feco Gomes di Curacao. Sr. Feco, cu a elabora con asociacion di musico y artistanan di Curacao ta funciona, y tambe a extende nan respaldo completo tanto na Stichting MUSICA y tur musico y artista nan di Aruba. Gomes a expresa cu ta boga pa pronto Aruba por keda cla cu e oprichting di AMAA y cu esaki por cuminsa opera y ta premira caba con e islanan, Aruba – Boneiro – Curacao y hasta menciona St. Maarten lo por uni forza pa traha hunto na bienestar di nos musico nan y artistanan.

PRESENTACION FUNCIONAMENTO MUSICA

Presidente di Stichting MUSICA Sr. Clyde Burke a duna amplio splicacion con Stichting MUSICA a funciona desde 2013 y lo keda traha duro pa yega na metanan cu a wordo stipula for di inicio di e Stichting. A pone enfasis riba continuacion di Aruba Caiso & Soca Monarch bou di nan maneho y e trabao nan cu ta wordo haci pa yega na formacion di AMAA cu lo cubri tur otro ramo di musiconan Arubiano y musiconan biba na Aruba. E reunion tabata masha interesante y tabatin bon opinion di tur esnan presente cu tambe a respalda Stichting Musica cu ta trahando na bienestar pa tur musico.

PREPARACION CAISO SOCA MONARCH 2016

Tambe a duna un update di con MUSICA ta prepara pa Caiso & Soca Monarch 2016, a splica cu tin hopi trabao andando y hopi pa concretiza ainda, pero lo tene su musiconan na haltura. Stichting MUSICA ta gradici cada un cu tabata presente y a duna nan respaldo na Stichting MUSICA y tambe kier a gradici Sr.Feco Gomes pa su prestigioso tempo y cu for di inicio semper a duna Stichting MUSICA tur sosten pa logra nan metanan y proyecto nan di futuro. NOTA. Foto ta archivo di inscripcion di caiso 2015.