Hulanda definitivamente for di Copa Europa 2016

AMSTERDAM – E oncena hulandes definitivamente ta keda for di e copa Europa 2016 na Francia. Na e ultimo chens pa cualifica via e forma di playoff, e oncena oraño a perde su di 5 wega den su Pool A. E oncena di e Republica Checo tabata mucho fuerte y a gana e partido diamars cu e score di 3-2, cu ta laga Hulanda na di 4 luga, no suficiente pa cualifica.

POSICION FINAL

Hulanda a keda tras di Republica Checo, Islandia, y Turkia cu de hecho, ta sali como e miho pa e copa Europa. Ta prome biaha den 31 aña cu Hulanda ta keda for di copa Europa. Mientrastanto e director tecnico su trabou, esta Danny Blind, ta keda sigura. Por lo menos segun e declaracion di e presidente di KNVB (organisacion nacional di futbol hulandes) Bert van Oostveen a declara despues di wega.

EFECTO LOCAL

Fuera di a laga un cantidad grandi di fanatico na Aruba desilusiona, e ta nifica tambe un sla comercial grandi pa un cantidad di establecimento hulandes otro aña. Cu Hulanda for di e copa, no tin sentido pa organisa eventonan rond di e copa, cu ta nifica sigur perdida di oportunidad pa gana placa. Esey no ta kita afo cu lo por transmiti weganan, pero no manera cu e euforia cu e makinaria hulandes lo a crea localmente.