Polis ta buscando testigo clave den caso di atraco arma

ORANJESTAD - Polis awe a manda informacion cu nan ta buscando testigo clave den caso di atraco arma. Nan ta referi na e atraco cu a sosode riba diabierna 18 di september ultimo, pa mas o menos 7:05pm riba e propietario di "Kevin Jewelry" situa den Havenstraat. Esaki a sosode net na momento cu e comerciante tabata subiendo su auto.

ATRACO TEAM

Polisnan a activa mesora y e ekipo specialisa riba e tipo di investigacionnan asina, "Atraco Team" a presente na e sitio pa tuma e investigacion over. Den e cuadro aki a repasa e caso y a verifica e pruebanan cu tabatin na e momento ey caba.

BUSCANDO TESTIGO

Den cuadro di e investigacion, y pa por yega na mas informacion cu por conduci na gara e sospechosonan envolvi, e Recherchenan di "Atraco Team" ta buscando e testigo cu a mira e atraco tuma luga. A papia cu ne e anochi ey, pero no a logra haya contacto mas cu ne.

TUMA CONTACTO CU POLIS

Ta haci un apelacion special riba e testigo encuestion, si e por tuma contacto cu Dennis Jacobs na 527-3283 of yama 100 of yama tipline 11141 pa por haya contacto cu e ekipo di Polisnan cu ta investigando e caso.