Merca nada contento cu Hulanda

WASHINGTON – Merca no ta nada contento cu Hulanda. NoticiaCla a compronde di su fuentenan, cu Merca ta hopi desapunta cu e actuacion di Hulanda di diadomingo cu nan a laga e ex general venezolano Hugo Carvajal den libertad. Segun Merca, Venezuela ta considera Carvajal un consul, pero pa Merca, e no ta un diplomatico. NoticiaCla a compronde cu e motibo cu Merca ta asina desapunta, ta cu Merca ta considera Carvajal un criminal peligroso y pesey nan no ta di acuerdo cu a dune e libertad, te pa e bay Venezuela caba.

Manera cu NoticiaCla a trece den un articulo anterior caba, E cargonan cu Merca tin contra Carvajal, ta serio.(Lesa e cargonan aki)  Merca kier Carvajal pa su cooperacion y relacion cu e grupo guerillero Farc di Colombia, door di a suministra nan entre toro Arma y tambe tabata envolvi den narcotrafico.

Loke cu Merca tampoco ta contento cune, segun e fuente a divulga, ta e interpretacion di Hulanda di e tratado di Viena, caminda ta considera Carvajal como diplomatico. E fuente na Consulado Mericano ta enfatisa cu Carvajal no ta un diplomatico na Aruba ya cu Hulanda no a acredit’e ainda. Tambe Merca ta conciente cu Venezuela a pone presion riba Aruba y Corsou pa asina por a logra e libertad di Carvajal. Pero Merca a bisa cu nan lo sigui trata pa toch tin husticia, no obstante e hecho cu a laga Carvajal bay.