Pone potret di bo boarding pass riba red social ta perhudica bo

MIAMI – Si bo post potret di bo boarding pass riba internet (Facebook), bo por keda ‘lastima’, y no ta pa bo coleganan di trabou cu ta jaloers di bo biahe. E chens ta grandi cu hendenan maligno por uza e informacion poni pa finnan negativo. For di haya bo fam, te na cambia bo itinerario di biahe, sin cu bo kier.

BO TA COMPROMETE BO INFORMACION

Ultimo tempo bo ta nota hopi mas hende (local) riba e.o. Facebook, ta pone nan pasaporte y boarding pass ora cu nan biaha. Esey ta nan forma di mustra cu nan ta contento cu nan ta biaha ‘porfin’ atrobe, sea ta pa broma of tenta, of simplemente comparti nan ‘plan’. Pero haciendo esey, bo ta compromete bo informacion segun un experto di seguridad Brian Krebs. E ta mustra riba su blog, cuanto informacion un boarding pass di un aerolinea ta contene. Y tur ta obtenibel pa medio di e ‘barcode’ (e strepinan banda di otro), cu ta facil visibel pa tur hende.

FREQUENT FLYER Y BARCODE

E data, fuera di e nomber y fam di e persona, ta inclui e origen di e biahe y tambe e destinacion, e ‘frequent flyer’ number y mas. Y tur loke cu e ladron di internet tin cu haci, ta uza e barcode y lese via un sistema special .E asina yama frequent flyer number por wordo uza tambe pa drenta cuenta di un persona y altera su itinerario Tim Stenovec di e revista Tech Insider ta confirma. E noticia sigur ta mal noticia pa miles di esnan cu ta gusta comparti tur nan informacion y sigur e biaheronan cu ta gusta ‘broma’ cu nan biahe tur caminda.