Ley nobo pa paga number di auto, mas complica cu a kere

ORANJESTAD – Mientras cu gobierno kier introduci e ley pa ‘moderniza’ e asunto di pago di ‘motorrijtuigbelasting’ pa 2016, e ta creando porta mas dolor di cabez pa gobierno. Door di no cobra un suma fiho mas pa aña, sino cobra na accijns di gasoline, e ta nifica cu lo tin hende cu lo bay contribui menos na e impuesto awor, pasobra nan ta core menos.” Y di otro banda lo bo tin hende cu ta core asina tanto riba caminda, cu nan lo contribui mas cu loke (normalmente) nan ta contribuyendo na e suma fiho di motorrijtuigbelasting”, Bermudez a sigui bisa. Algo cu semper ta sosode ora cu bo ta buscando un sistema pa bo funciona mas eficaz posibel. “Lo purba di tene cuenta cune” e mandatario a sigui bisa.

AYUDO PA ESNAN ‘PERHUDICA’

Como tal kier e mandatario ta considerando pa esnan cu ta biba den un region cu tin cu core basta kilometer prome cu e yega na pia di trabou, bin cu un facilidad den loonbelasting pa nan haya un ayudo den esaki. Tur esaki sinembargo, no ta sigur ainda. Esaki pasobra no ta sigur cu lo keda cla e aña aki ainda cu e ley pa cambia cobransa di belasting di number di auto. Ehercicionan ta tumando lugar pa keda cla cu e structura y e minister encarga a confirma cu esaki no ta facil, “ Pasobra tin diferente tarifa di motorrijtuigbelasting”. Mester ta sigur cu tur ta cubri y cu tur hende haya nan pago corecto. E hecho cu tin hende cu lo paga mas y otronan menos, ta e realidad cu lo tin cu biba cune y ta puntonan cu ta bin acerca ora cu bo kier moderniza un sistema di belasting. No ta tur hende lo keda beneficia di dje.

CALCULACIONAN MESTER TA BALANSA

E mandatario ta conciente di e diferente tarifa cu ta pagando aworaki, manera 320 (florin annual), 620 y mil florin dependiendo di e tipo di vehiculo. Ta tene na cuenta tambe e capacidad di un auto pa loke e ta core. “Esey ta haci e stipulacion di e tarifa pa diesel y gasoline complica. Pesey a pidi CBS pa yuda pa e calculacion complica pa yega na un balanse “ e mandatario a bisa. Esey ta pa e grupo grandi (masa) e calculacion por sali budget neutral. E mandatario a sigura un biaha mas cu e medida aki no ta pa aumenta entrada di gobierno, sino mester considere como un modernisacion di e ley di belasting pa auto. Ta spera cu e siman por haya e calculacionnan di CBS y e diferente senarionan y wak cua ta mas comodo pa e comunidad.

FALTA DI PAGO AWOR

Declaracionnan haci recientemente pa oficina di impuesto ta confirma cu e aña aki 30% di hende no a paga nan impuesto pa 2015 ainda. Como tal gobierno tin cu warda riba e placa aki te ora cu hendenan haya bon di paga segun e mandatario. E hecho cu polis por controla, ta tuma tempo di e polisnan cu por wordo uza pa otro finnan mas practico y necesario segun e mandatario.