Fin di luna tin claridad si cambio ley motorrijtuigbelasting ta sigui

ORANJESTAD – Si no logra keda cla cu e cambio di ley di motorrijtuigbelasting, esta e cobransa via accijns na gasoline envez di paga un suma fiho na belastingkantoor, lo tin cu wanta e ley vigente y pospone e intencion pa proximo aña. Fin di luna awor ta haya un claridad riba esey. E mandatario a admiti cu no a order plachi nobo di auto pa 2016, pues un cos ta sigur cu den 2016, lo core cu number di 2015 atrobe. “Semper tin otro alternativa, si mester mantene e sistema (actual) pa algun luna mas of otro aña ainda”. Entre otro por uza stickers, aunke e mandatario no ta mucho pro pa esey debi na varios motibo.

FALL BACK PLANS

“Semper tin fall back plans, pero ora cu bo ta trahando, bo ta traha abase di bo creencia y objetivo. Por ta tin un retraso chikito riba e legislacion pasobra ta hopi druk di parlamento pa e cuartal aki. Pero den su base, ta hopi oportuno pa modernisa e ley aki” e mandatario a bisa. Si no logra keda cla, e ley existente ta keda na vigor, pues nada no ta cambia y hendenan ta keda paga nan number na belastingkantoor manera semper a sosode.