Vice presidente Raad van State a reuni cu lider di partido MEP na Aruba

ORANJESTAD -- Den fin di siman ultimo Piet Hein Donner, vice-presidente di Raad van State na Hulanda tabata na Aruba y a reuni cu lider di partido MEP. Durante su bishita el a invita lider di MEP Wever-Croes pa un reunion. E meta di e reunion tabata pa e forma un opinion balansa riba e situacion real na Aruba.

REUNION DIASABRA

Wever-Croes a reuni cu Donner diasabra merdia, y durante e reunion a toca naturalmente e conseho cu Raad van State a duna riba e KB di juli aña pasa, y cu segun Wever, e forma cla y raspa cu Raad van State a bisa Hulanda cu en bes di a manda un KB, Hulanda mester a manda un algemene maatregel van rijksbestuur, cu ta un medida mas pisa.

MAS TEMA

Wever a mustra cu a toca varios otro tema, entre otro e situacion financiero di pais Aruba y e poco progreso cu tin riba e tereno aki. Tambe a toca e tema di seguridad y husticia, caminda e enfasis tabata riba e hecho cu ministerio publico no ta investiga casonan grandi y dudoso cu ta atacha integridad den gobernacion, y e hecho cu Parlamento no ta funciona. Wever-Croes a splica cu hustamente esakinan ta e dos pilarnan cu partido MEP ta haya cu mester pone mas enfasis riba dje, e pilarnan cu MEP lo construi bienestar pa nos comunidad.

INFORMACION BALANSA

"Esey ta nos vision, y esey ta nos plan. Mi a comparti cu sr. Donner mas detayes di nos plan tambe con nos lo rescata Aruba. Nos a papia di varios otro tema di importancia pa Aruba, entre otro e tema di imigracion, e tema di refineria, e tema di proyectonan PPP, e tema di falta di democracia den Parlamento, e tema di pobresa den nos pais. E tabata un bon reunion y ami a duna di mi parti pa asina sr. Donner haya informacion balansa cu e por hiba bek Hulanda", Wever-Croes a duna di conoce.