Bermudez: No a tene informacion atras deliberadamente pa Caft

ORANJESTAD – “Tur loke cu gobierno ta produciendo, College Aruba Financieel Toezicht (Caft) ta hayando”. E hecho cu e colegio su comentario recien ta mustra cu tin deficiencia den e forma di informa nan, cu informacionnan incompleto, no ta falta di gobierno. Asina e minister encarga cu finanzas Angel Bermudez ta sigura NoticiaCla.com. Pero e problema ta cu tin falta di personal, atraso di informacion y cu cierto asuntonan no ta actualisa. Esey ta dificulta e proceso pa haya tur informacion cu e.p. Caft mester. Y ta trahando riba esaki pa mehora e situacon asina. Como tal gobierno ta sigura cu no ta asina cu deliberadamente gobierno ta teniendo informacion atras, strobando Caft di haya un bista cla riba e situacion financiero di Aruba.

KEHO DI CAFT RIBA FALTA DI INFORMACION

No tin un coneccion entre e maneho y e proyeccion multi anual (meerjarenraming), of por lo menos, e no ta suficiente ‘cla’ pa College Aruba Financieel Toezicht (Caft). Asina e colegio di supervision independiente di Aruba a bisa den su publicacion di  su conseho na gobierno basa riba e concepto di presupuesto 2016 di pais Aruba. Conciente cu e no ta un presupuesto completo, nan a duna comentario solamente riba e puntonan principal di e concepto. Esey no ta kita afo cu atrobe, e comentarionan a laga di desea pa loke ta e trabou di gobierno. Loke ta resalta ta cu falta informacion, y cu door di esey, no por haya un bista cla di kico e intencion di gobierno ta pa cu 2016. Y ora cu tin informacion, e no ta completo (atrobe).