Gobierno ta admiti mal trabou di administracion studielening

ORANJESTAD – E alegacion di e colegio di supervision financiero Caft cu colecta di placa di studiefinanciering ta atrasa y no ta mustra un bista real, no ta berdad. Di otro banda, minister Angel Bermudez admiti na NoticiaCla.com, cu gobierno di mesun problema cu belasting, esta di cobra e placa aki bek. “Ta retrasonan cu a crece den tempo di aña, mal administracion y mal maneho den curso di hopi aña, cu no a wordo cobra na tempo loke mester a wordo cobra”. Pues e mandatario no ta sconde cu mal trabou a wordo haci, cu awe nan ta den e situacion aki. Mes momento e mandatario ta sigura cu e aña aki a cuminsa drecha e situacion y ta spera cu otro aña tur cos mester ta up-to-date.

TA INVENTARISANDO CUANDO E DEBE TA

Cu drecha e situacion, e mandatario ta referi na e hecho cu a cuminsa ‘inventarisa henter e cantidad di fiansanan di studielening di ultimo 30 añanan. Gobierno a otorga mas of menos 500 miyon florin na studiantenan cu a bay studia afo ultimo 30 aña segun Bermudez. E administracion y registracion di e leningnan no ta completo y actualisa y esey ta trahando riba dje. A pone personal dedica riba e tema pa otro aña tin un bista ken debe kico y con ta bay cobra esaki. “E cobramento ta tumando lugar pero e cumplimento di e cobransa no ta 100%”. Bisando esey, Bermudez ta rechasa cu e suma cu gobierno a pone como debe di e studielening ta mucho abou, y cu segun cu Caft mester aumenta esaki. “Loke mester sosode ta cu nos mester sa prome exactamente kico nos tin na debe di e fiansanan ey y ken nos por cobra ainda y despues pa nos bay cobra y e ora nos por bisa cu ta e suma cu nos no por cobra mas etc”. Riba e pregunta ey, e website aki a confronta e mandatario cu e facto e ora, Caft tin rason di señala esaki pasobra gobierno no tin un bista actual. Pero e mandatario ta para ariba cu no ta cuestion di ken tin rason of no.

CAFT SU KEHO PA CU STUDIELENING

Aruba tin un problema pa colecta placa di e prestamo estudiantil, conoci como studielening. Y como tal College Financieel Toezicht ta premira cu esaki lo aumenta solamente mas, si no haci algo cune y pone cu e lo bira mas bien, ‘debenan incobrable’. Y si no haci algo, lo no logra recolecta e placa di estudio bek, y lo tin cu considera esaki como un tipo di subsidio ‘scondi’. Esaki ta nifica cu pasobra gobierno no por colecta e placa, nan lo a basicamente ‘subsidia’ e placa cu nan a ‘fia’ inicialmente cu intencion di haya bek. Asina e colegio di supervision financiero a relata den nan ultimo conseho pa gobierno, cual conseho a bira publico siman pasa. 

PLACA INCOLECTABEL LO AUMENTA

Segun Caft, fin di 2014 tabatin 381 miyon na studielening, di cual 138 miyon (36%) ta premira cu no por wordo colecta bek. Caft ta mustra cu nan no tin un bista riba e proceso di e prestamonan aki, pero ta premira cu e cantidad di placa cu no por wordo colecta, lo aumenta mas ainda, y cu e prestamonan aki ta haya un ‘caracter’ di subsidio scondi. “Gobierno mester tene cuenta cu esaki den e presupuesto 2016, of mester por prueba cu e resto di e suma di 243 ta colectabel". Lesa e rapport completo aki.