Experto K9 di Belgica impresiona cu unidad di K9 di KPA

ORANJESTAD – E experto K9 di Belgica Dirk Lemmens a keda impresiona cu e unidad di K9 di KPA e siman aki. Den un combersacion cu Noticiacla.com e fin di siman aki, e la mustra cu e la keda altamente impresiona. “Tin aki aya cu por mehora algo, pero en general nan ta un bon team cu bon cacho” Lemmens a sigui bisa. E siman cu a pasa, e la train cu e ekpo di KPA y tambe di CEA, y a mustra su abilidad y pasa e informacion aki pa e team local. Diasabra ultimo tabata e ultimo dia di entrenamiento y a haci esaki entre otro riba tereno di ex JFK school. NoticiaCla.com riba invitacion di e hefe di unidad di K9 di polis, Richard Kramers, tabata presente y a experencia e entrenamiento aki. 

LEMMENS

Lemmens actualmente ta traha cu Belgische Spoorwegen como supervisor, coach y trainer di e brigada di cacho. Su tarea principal na Aruba tabata pa haci e cachonan mas social, particularmente pa cu nan trabao ora di temporadanan druk manera Carnaval, unda cu nan ta move entre hopi hende.

E TRAINING MES

E training ta bayendo hopi bon y Aruba tin cachonan fantastico, segun Lemmens, kende a expresa cu e lo kier bolbe pa traha cu un grupo mas grandi, incluyendo, ademas di e cachonan di Polis, tambe e cachonan di Duana y di KIA.

ENTRENA MANERA TA TRAHA Y TRAHA MANERA TA ENTRENA

Lemmens a splica cu su lema ta “realiteitstrainingen”; “Entrena manera bo ta traha, traha manera bo ta entrena”. Un parti di e training tabata consisti di observacion di e cachonan cu nan partner y e reaccion di e cachonan ora nan ta den hopi hende. For di eynan, Lemmens ta adapta su programa na e situacion actual pa motiva cambionan den comportacion di e cachonan. E training a dura un siman y despues di algun dia caba, Lemmens a expresa cu “nos ta yegando eynan” y cu e ta pensa cu sigur na final di e siman tur nanishi lo ta den e bon direccion.