SERLIMAR ta pidi cooperacion di habitantenan di Bushiri pa mantene bario limpi

ORANJESTAD – Semper cu tin un Accion di Bario Prome Minister Mike Eman ta wordo compaña pa funcionarionan di diferente departamento manera Departamento Social, DOW, Serlimar y otronan. Asina e mandatario ta haya chens di busca solucion mas lihe posibel pa e problemanan cu ta wordo poni na su atencion durante e bishitanan aki.Un di e chefnan na SERLIMAR cu semper ta compaña Prome Minister Eman ta Erwin Werleman. Den e bishitanan aki, no solamente e y su hendenan ta duna un man pa recoge sushinan acumula cu mester bay dump, pero tambe ta recoge cosnan bieu cu e habitantenan mes no por hiba te na e dump na Parkietenbos.Werleman a splica cu na Bushiri mes nan a topa cu varios dump ilegal. P'esey durante e bishita aki a probecha pa combersa cu e habitantenan, no solamente pa conscientisa nan riba e hecho aki so, sino pa pidi nan cooperacion pa ora cu SERLIMAR haci un area limpi yuda mantene di e forma aki, esta limpi. Pa logra haya gara esnan responsabel ta hopi dificil, a menos cu ta mira e hendenan haci esaki y keda graba riba video of potret. Den casonan asina, Oficina di City Inspector mester wordo envolvi.Na Bushiri recientemente a haci un tereno basta grandi limpi, pero mas cu esey no por haci pa evita cu e hendenan ta tira sushi. Ta solamente e control social, di e mesun habitantenan lo por yuda. Ta di spera cu e ciudadanonan mira cu e area ta hopi limpi aworaki, cu nan coopera pa mantene asina tambe.Mescos cu Bushiri tin hopi area cu ta wordo haci limpi door di SERLIMAR durante Accionnan di Bario, pero nan ta haya hopi lamentabel cu despues di algun siman, ta bolbe y haya un cantidad grandi di sushi mes. Den casonan asina, manera a wordo indica caba, e wowo di e habitantenan ta esnan cu por evita cu situacionnan asina ta surgi atrobe.