CBA: CREDITO DOMESTICO A AUMENTA

ORANJESTAD - Den e luna di juli 2015, e cantidad di placa den circulacion a baha cu Afl. 8,1 miyon te na Afl. 3.601,2 miyon, causa pa un caida di Afl. 36,0 miyon den e reserva di divisa netto y un expansion di Afl. 27,9 miyon den e activo domestico netto. E caida den e reserva di divisa netto ta debi na benta netto di divisa door di banconan comercial na e publico asocia principalmente cu pagonan pa mercancia, e asina yama “income account”, transferencia coriente como tambe e transferencianan netto pa cuentanan den exterior di companianan local. E benta aki a wordo parcialmente mitiga pa compra netto di divisa door di banconan commercial for di publico relaciona cu turismo y otro inversion. Un aumento den credito domestico di Afl. 37,6 miyon, cu a wordo parcialmente mitiga pa un bahada den transaccionnan no relata na credito di Afl. 9,6 miyon, a causa e subida den e activo domestico netto. Credito domestico a aumenta door di subidanan den credito bancario na e sector priva y e sector publico. E aumento den credito na e sector priva a wordo causa pa expansion den credito na tanto empresa como hipoteca pa vivienda. Di otro banda, credito na consumidor a baha. E aumento den credito bancario na e sector publico a wordo causa principalmente pa un caida den depositonan di gobierno. InflacionE nivel general di prijs, cu ta wordo midi door di e indice di prijs di consumo (CPI), a registra un subida di 0,9 porciento den e luna di juli 2015, compara cu juli 2014. E componente “Vivienda”, cual a registra un crecemento di 1,4 porciento, tabata e contribuyente principal na e subida aki, bayendo di 0,1 porciento na juli 2014 pa 1,4 porciento na juli 2015. E aceleracion di inflacion aki ta debi primordialmente na e sub-categoria “Electricidad, gas y otro combustible” di e categoria vivienda, causa pa un aumento den tarifa di coriente na october 2014. Excluyendo e componentenan di cuminda y energia, inflacion tambe a subi, esta cu 0,7 porciento. Pa loke ta trata e promedio anual di e tasa di inflacion, esaki a permanece igual na 1,0 porciento na juli 2015 compara cu juni 2015. TurismoNa juli 2015, e cantidad di turista a registra 109.251 bishitante, cual ta 13,9 porciento mas cu na juli 2014. E expansion di 23,8 porciento y 9,8 porciento, respectivamente, den tanto e mercado Latino Americano como e mercado Norte Americano, tabata responsabel pa e crecemento aki. E subida den e mercado Latino Americano ta primordialmente e resultado di un aumento di 33,3 porciento (+6.428 bishitante) for di Venezuela. E subida di 10,3 porciento (+5.629 bishitante) for di Merca ta e causa principal di crecemiento den e mercado Norte Americano. Den e luna en cuestion, e cantidad di anochi destina pa pasa na Aruba, manera indica door di bishitantenan, a crece cu 9,0 porciento, compara cu e mesun luna di e aña anterior. E averahe di anochi destina pa keda na Aruba a baha un poco, esta di 7,1 anochi na juli 2014 pa 6,8 anochi na juli 2015. E cantidad di turista crucero a baha cu 36,7 porciento te na 23.627 na juli 2015, compara cu juli 2014. E cantidad di barconan crucero a baha pa 10 na juli 2015, for di 16 na juli 2014.