Plasterk: Falta hopi pa bin un geschillenregeling

DEN HAAG – A trata e presupuesto di ministerio di Relacionnan di Reino ultimo dos dianan den Tweede Kamer na Hulanda. Y ayera minister Ronald Plasterk a duna contesta riba e pregunta di parlamentarionan.

GESCHILLENREGELING

Y atrobe, mayoria di miembronan di e parlamento a urgi e mandatario pa bin cu un geschillenregeling. E mandatario sinembargo, a bisa cu por lo pronto esey lo tin cu warda. El a mustra cu e proceso a core retraso awor cu dos di e tres premiernan di e islanan Caribe den Reino no ta den funcion mas. E respectivo islanan ta contra un areglo temporal den cual Raad van State por duna un conseho di peso, pero no obligatorio. Nan tin miedo cu conseho di minister di reino por ignora e consehonan aki.

GASTONAN DI INTERES DI ARUBA

Madeleine van Toorenburg (CDA) a mustra su preocupacion pa cu e interes halto cu Aruba tin cu paga riba su debenan. Segun Plasterk, e diferencia enberdad ta halto. Corsou y St Maarten cu tin un debe di estado mas abou, ta presentando placa riba 1.5% y ta pagando 3% na interes. Aruba mes ta presta placa, y ta paga 6% y 15% na interes. Pa ora cu Caft sinti cu cos ta bayendo den bon direccion, e mandatario ta dispuesto pa mira si Aruba por presta riba e mesun condicion cu e otro paisnan. Andre Bosman a bisa cu e ta preocupa riba esey, pasobra segun e Caft ta haya poder di por dicidi hunto cu gobierno. Plasterk a rechasa e pensamento ey, indicando cu ta conseho di minister di Reino tin e ultimo palabra.

PARLAMENTO FALSO

Un discusion interesante tabata esun di Sietse Fritsma (PVV) cu a pega formal cu varios miembro di parlamento y e presidente Anouchka van Miltenburg. Segun e miembro di PVV, e kier pa Hulanda sali for di Reino. Cu Tweede Kamer no ta sigui e deseo di mayoria di hulandesnan segun PVV, ta haci cu Tweede Kamer ta uno falso. Pero segun Nacionan Uni, Hulanda no por actua su so, y Plasterk a referi na esaki tambe.

Di Caribisch Netwerk   Autor Pieter Hofmann