Jerry Seinfeld: Bebe koffie cu amigo ta miho cu biaha pa Aruba

LOS ANGELES – Mientras cu mayoria di artista/actor internacional ta papia bon di Aruba, y ta duna e isla un cobertura impagabel positivo, tin tambe cu ta opta (porta sin intencion) pa duna Aruba un ‘mal nomber’. Esaki tabata e caso recientemente durante un entrevista entre e agencia di noticia Associated Press y e comediante/actor Jerry Seinfeld. Seinfeld tabatin su propio serie televisa pa hopi aña y a actua den varios pelicula popular. Durante e entrevista aki e la papia 'malo' di Aruba, of por lo menos, desprecia nos isla. Lo 'interesante' ta cu di henter e entrevista, ta netamente e parti di Aruba a bira e titular di henter e entrevista, cual no tabatin nada di haber cu Aruba mes. 

ENTREVISTA

E entrevista mes tabata riba e bida actual di Seinfeld, basa riba un decision cu el a tuma di usa internet pa pasa su proximo produccion, versus e formanan usual. Aki a surgi un pregunta, cu si Seinfeld ta bebe hopi koffie. Un pregunta comun e inocente. E contesta, sinembargo, a sorprende hopi.

PREFERA COFFEE ENBES DI BIAHA PA ARUBA

Seinfeld a contesta cu positivamente e ta bebe hopi coffee. “Mi no a cuminsa bebe koffie sino te algun aña pasa. Mas awor cu mi ta haciendo mi show” Seinfeld a bisa. “Mi ta gusta e tipo di simplicidad. P'ami bo no mester hopi pa pasa bon. Vacacion hopi biaha ta kens!” Seinfeld a sigui bisa. “Ora cu bo bebe koffie cu un amigo, bo lo probablemente pasa miho, cu si bo bay Aruba”. E combersacion a continua su caminda, sin mas referencia na Aruba. Mientras cu e ta posiblemente un comentario sin mas, e forma con esaki a sali y cu el a keda publica, toch ta mustra cu su pensamento di Aruba sea no ta bon of e no tin afiliacion cu Aruba. Lesa e entrevista completo cu Seinfeld aki.

.