Aruba a gana premio di sostenibilidad ‘Nachhaltigkeitspreis’

ORANJESTAD - Despues di a gana e ‘National Geographic World Legacy Award’ na Berlin na luna di maart ultimo, Aruba a bolbe score den e mercado Aleman! Cu plannan concreto y serio pa logra di ta un isla ‘carbon free’ na aña 2020, Aruba a logra e di dos puesto den e premio di sostenibilidad ‘Nachhaltigkeitspreis’ otorga dor di e revista di biahe Aleman ‘Travel One’. A nomina un total di 21 producto y proyectonan y analisa pa un cuerpo di hurado consistiendo di 5 experto den e industria di turismo y desaroyo di medio ambiente na Alemania. A premia e proyecto y iniciativanan cu ta influencia e industria turistico y ambiente social den un forma sostenibel y positivo. Den esaki ta tene cuenta cu e influencia economico di e proyecto of iniciativa. E ceremonia a tuma luga den un cinema cu mas di 200 invitado selecciona for di e industria di turismo na Alemania, unda a enfoca riba e esfuersonan di Aruba, anto riba escenario cu pantaya grandi! E prome luga a bay pa e proyecto di ‘Energy for Nepal’ na encargo di e asociacion di tour operatornan sostenibel ‘Forum Anders Reisen’. Riba e potret por mira representantenan di Aruba Tourism Authority na Alemania na momento di entrega di e reconocemiento aki.