Aruba a firma acuerdo cu Seneca College na Canada

TORONTO -Diahuebs dia 8 di october Minister Hooyboer-Winklaar a firma un Memorandum of Understanding cu Seneca College, un "Hogeschool" na Toronto, Canada. E acuerdo aki ta e prome firma entre Aruba cu un institucion di Enseñansa Superior na Canada. E acuerdo aki ta habri porta pa varios intercambio entre Aruba y Seneca College, asina tambe dunando nos studiantenan aceso na un estudio di calidad halto.

POSIBILIDAD PA STUDIANTENAN

Cu e acuerdo formalisa, studiantenan di Aruba lo tin aceso na mas cu 290 programa den e area di applied arts, aviation, health sciences, business, financial services, media and communication, technology, information technology y science and engineering. Mas specifico, studiantenan di Aruba lo conoce un reduccion den e tuition fee cu studiantenan internacional ta paga. Esaki ta alrededor di 30% riba diferente programa di diploma, cu ta varia entre $13,000 pa $18,000 pa aña dependiendo riba e programa. Prijsnan di estudio na Canada ta conoci pa ta mas abou cu programanan similar na Merca.

SENECA COLLEGE 

Seneca College ta existi 48 aña, y tin 4 campus na Toronto, York Region y Peterborough. Actualmente tin alredador di 25,000 studiante den varios programa.  Recientemente a provence di Ontario a otroga Seneca College y York University e gunning pa crea un joint campus den e cuidad di Markham, noord di Toronto. E campus aki lo ta “ state of the art “ y lo facilita 4000 studiante mas. E acuerdo aki cu Aruba ta solamente 1 den 3 acuerdo cu Seneca College tin formalisa cu paisnan, cu ta inclui China y India.