Gobierno ta kibra silencio

 ORANJESTAD - Diahuebs atardi 3'or, Gobierno di Aruba ta kibra silencio di un siman relaciona cu e crisis constitucional cu a surgi for di un siman pasa ora cu gobernador di Aruba no a firma e presupuesto 2014 pa convirtie den un ley. NoticiaCla a compronde di representantenan di gobierno cu e topico lo ta e situacion di crisis, y cu aparte di prome minister Mike Eman, tur otro minister actualmente na Aruba, lo ta presente. Cu e conferencia aki pues, comunidad por haya sa probablemente si Aruba a sali for di e impasse aki cu gobierno hulandes of si esaki ta meramente un antesala di e reunion di diabierna na Hulanda.

For di momento cu gobernador di Aruba nenga di firma e presupuesto di pais Aruba siman pasa, a reina un silencio hermetico den aparato gubernamental ya cu ningun gobernante a aparece mas den publico pa duna splicacion riba e situacion. Aparte di algun apariencia e siman aki di dos diferente minister, ningun gobernante a papia algo y a opta pa warda e reunion di diabierna awor unda cu un desicion lo mester cay riba e situaion financiero di pais Aruba. Mientras cu parlamentarionan di Aruba ta cuestiona y debati e actuacion di Hulanda y gobernador den e asunto di presupuesto, Aruba su futuro financiero ta riba agenda pa wordo trata diabierna awor den Conseho di Minister di Reino. Y den tur esaki, ainda prome minister di Aruba ta sigui for di bista publico. Mientras un sin fin di rumor ta core rond, fuentenan yega na e mandatario a sigura cu e ta trahando duro tras di cortina pa resolve e problema. E lo ta den contacto estrecho cu su colega Yrausquin na Hulanda. Mientrastanto ex secretario di estado Hulandes pa asuntonan financiero Frans Weekers a declara na Hulanda awe cu e la wordo pidi pa tanto gobierno di Hulanda como di Aruba pa asisti Aruba cu e problema financiero cu e ta aden aworaki. Esaki lo bira su proximo tarea, y muy probablemente lo anjadi ex director di Banco Central di Aruba Hassanali Mehran den e comision aki. Un comision cu ainda no ta sigur di su existencia. Por lo menos segun informacion cu NC ta ricibiendo for di Hulanda awe. Tur cos ta depende di e resultado di e reunion den Conseho di Minister di Reino cu ta tuma lugar mayan na Hulanda. E corant Hulandes NRC ta raporta awe cu Hulanda a manda Weekers pa yuda drecha e situacion financiero malo di Aruba, den un intento pa evita un 'aanwijzing' for di Hulanda. Pero si esey ta logra pues, ta wordo dicidi mayan y como tal su intervencion no ta confirma ainda.

Den e matutino Bon Dia Aruba siman pasa caba, a sali e informacion cu e problema entre Hulanda y Aruba ta pa motibo di e dos personanan menciona, esta Mehran y Weekers. Minister di Aruba encarga cu finanzas, Juan David Yrausquin a desmenti cu esey ta e problema, y cu ta mas bien e contenido di e comision su trabou, ta e problema. Awe Weekers sinembargo ta contradeci e informaicon indicando cu e comision su existencia y e participacion di Weekers mes no ta confirma ainda. "E no ta confirma, pero mi ta dispuesto pa haci e trabou" Weekers a sigura na Hulanda awe. Mientrastanto NoticiaCla tin informacion di e motibo pakico gabinete Mike Eman 2 a haye ta scramble siman pasa diabierna anochi: Confronta cu un posible 'aanwijzing' diabierna awor, cu a pone cu nan mester a 'scramble' pa actua prudente contra esaki. NoticiaCla su fuentenan fededigno a confirma cu ta un invitacion cu Gobierno di Aruba lo a haya di parti di Gobierno di Reino pa i e reunion 'extra' di Conseho di Minister di Reino, programa pa diabierna awor. Riba su mes un invitacion asina no ta nada nobo. Pero ora cu a mira e agenda di e reunion, lo a nota cu e afamado 'concept aanwijzing' tabata riba agenda di e reunion. Por lo menos, un concepto di un aanwijzing cu Aruba lo por haya su mes sirbi cune, si e no regla su asuntonan financiero den un tempo specifico. Kico e reglamento aki mester ta, ainda no ta mucho conoci. Gobierno mientrastanto for di siman pasa diabierna ta den un silencio total, unda cu ningun minister no ta papiando riba e topico aki. Y si papia mes, ta refiriendo na prome minister Mike Eman pa trata e topico cayente. Como tal durante un evento na aeropuerto diamars merdia, no tabata sorpresa cu minister Paul Croes a meramente confirma solamente cu tin reunionan andando na Hulanda entre su colega Yrausquin. Y gobierno Hulandes, y cu pa e siman aki mes lo mester tin un solucion riba mesa. Mes momento e mandatario a confirma cu si no soluciona esaki liher, lo por tin problema financiero pa nos pais, particularmente cu pago pa entre otro trahadonan. Pero e tin confiansa cu esaki lo keda soluciona. 

Mes momento diamars, lider di fraccion berde Rene Herde a subraya cu e problema no ta uno di Hulanda y como tal e no ta compronde pakico nos a yega asina lew. Herde, den un reaccion na NoticiaCla ayera, a referi tambe na un lectura di un profesor di ley constitucional, a declara cu e loke cu si gobierno di Reino kier impone riba Aruba riba tereno di finanzas, usando e poder di gobernador, esaki no ta legal. Segun Herde, trata presupuesto y finalmente aprobe, ta un asunto di Aruba y no di Hulanda pues no ta compronde pakico Hulanda ta metiendo cu esaki. Herde tabata basta  fuerte den su declaracion pa cu Hulanda y a mustra cu gobernador mester firma e presupuesto pa Aruba por sigui funciona como pais. Loke a hala atencion ta e hecho cu Herde a bisa cu no por responsabilisa parlamento pa acuerdonan pafo di parlamento. Esaki pasobra awor lo a resulta cu no a firma e presupuesto pa motibo cu no a cumpli cu acuerdonan entre Hulanda y Aruba. Segun Herde, parlamento no sa di ningun acuerdo pafo di parlamento pues no por strobe den esaki tampoco. Hecho ta cu cosnan ta 'cayente' y cu den e proxiom 24 pa 48 ora, nos lo mester tin un miho idea di kico lo sosode cu Aruba.