Timmermans: Aruba no ta afecta pa cambio den rekentoets

DEN HAAG/ORANJESTAD – Recientemente parlamento di Hulanda a tuma cierto decisionnan riba e asina yama ‘rekentoets’ pa klasnan di examen di scolnan secundario avansa manera Colegio Arubano. Entre nan, cu a pospone esaki te 2020, den e asina yama ‘zak/slaag regeling. Esey ta nifica cu alumnonan tin cu traha e toets aki si, pero nan no por ‘zak’ si nan no traha esaki bon. Pa vwo esaki ta sigui normal. Na Aruba, segun rector di Colegio Arubano Hans Timmermans a sigura NoticiaCla.com awe mainta, e situacion ta conta practicamente mescos, den sentido cu e aña aki alumnonan por tuma e toets, pero no por keda sinta riba dje, si nan trahe malo.

SITUACION HULANDA

Den combersacion cu Timmermans, e ta splica cu na Hulanda, e aña aki e toets ta wordo implementa den e curiculo di vwo, esta cu eynan si, si bo no traha e toets ey bon, bo por druip/zak pa bo examen. Pa havo/mbo, e toets ta keda obligatorio, pero alumnonan no por zak/druip pa fayo di e toets. “Si e resultadonan mehora proximo añanan, e toets lo por wordo inclui tambe na HAVO/MBO den e regla di zak/slaag.

KICO E REKENTOETS TA

Den sentido general, e abilidad di e alumno riba ‘rekenen’ y e ‘abilidad pa calcula’ lo wordo calcula. Problema ta cu hopi di e pruebanan aki ta contene hopi texto, cu ta dificil pa alumnonan compronde y aki hopi di e fayonan ta tuma lugar.

EFECTO PA ARUBA

Mientras cu Hulanda a dicidi caba kico pa haci cu e toets, aki na Aruba e decision no a cay ainda. Y como tal ta dificil pa Timmermans splica ki consecuencia e decision nobo aki tin pa Aruba y consecuentemente Colegio. “Mi kier sa prome kico Aruba ta dicidi. E aña aki, e rekentoets lo a wordo aplica na havo y vwo caba, pero bo no por zak/druip pa motibo di dje. Si lo tabatin posibilidad pa e alumnonan di havo di e asina yama ‘voorexamenklassen’, esta e klas 4 di havo, pa ‘haal e toets’” Timmermans a sigui bisa. “Nos mester mira prome kico Aruba ta dicidi, pero como cu e toets ta sigui existi como toets, mi ta kere cu tur cos por sigui normal”. No ta conoci si Colegio eventualmente por ‘desvia’ di e decisionnan aki. “Mi no sa. Mi no sa kico e palabracionnan ta” e rector a sigui bisa. E cantidad di alumno cu ta wordo afecta, ta tur di havo 4 y vwo 5.