MUSICA: Situacion entre SMAC y MUSICA ta leu di ta bon

ORANJESTAD – Asuntonan entre e asociacion di carnaval, SMAC y esun musical, MUSICA, ta leu di ta bon. Riba e mesun dia cu SMAC a presenta su relato financiero den un intento pa mustra nan transparencia, MUSICA a emiti un comunicado pa mustra cu transparencia no t'ey entre SMAC y nan. Declaracionnan cu segun MUSICA no ta cuadra, y placa ainda cu no a wordo paga na MUSICA procedente for di SMAC, ta pone cu henter e entrega di e relato financiero a haya un luz diferente.

RELATO FINANCIERO SMAC

Mas prome den dia, minister di cultura Otmar Oduber a ricibi e relato financiero di SMAC, y a elogia e fundacion dunando e su merito. E mandatario a mustra na e occasion, cu e tabata contento cu cumplimento di statuut di SMAC, door di presta transparencia, y cu e entrega di e jaarrekening, y e programa pa e aña siguiente, a logra e meta. Pa loke ta e organisacion su presidente a mustra cu a ‘practicamente break even’ aunke cu tin haci algun ahuste ainda.

COSNAN NO TA CUADRA

E comunicado di MUSICA sin embargo ta papia otro idioma. Segun e comunicado ta bisa, cu atrobe hunta di directiva di organisacion MUSICA ta tuma nota di cosnan cu no ta cuadra cu berdad ta wordo publica pa presidente di SMAC Randy Thiel

“Siman pasa a wordu yama di un dia pa otro un reunion cu bandleadernan door di SMAC, caminda e organo cu ta representa e bandleadernan mes, esta MUSICA, no a haña invitacion pa e reunion aki” e comunicado ta bisa. Segun MUSICA, mesora musiconan a tuma contacto cu nan presidente, Clyde Burke, pa puntre si e ta na altanto di e reunion aki. Asina Burke a haña su mes ta bai e reunion aki pa si en caso tin cosnan pa aclaria di parti MUSICA por hasi esaki al instante.

REUNION PA ACLARIACION

Segun e comunicado, e intencion di e reunion aki tabata otro cu a resulta, y door di e presencia di presidente di MUSICA hopi a wordu aclaria. Na final a palabra cu MUSICA lo presenta su Financieel Rapport 2015 na su musiconan y na Raad Van Toezicht y lo reuni cu SMAC solamente den presencia di e Raad van Toezicht nombra pa controla SMAC aña pasa.

Burke a splica cu tin cierto acuerdonan hasi entre SMAC y MUSICA por escrito cu mester wordo cumpli cune di ambos banda, y no ta asina cu diripiente ta bin cu otro asina yama exigencianan cu mester cumpli cune prome cu musiconan haña nan pago.

SMAC NO A LAGA MUSICA ORGANISA CALYPSO 2015

Segun MUSICA, mester aclaria cu na ningun momento SMAC no a dicidi di laga MUSICA organisa Calypso & RoadMarch Monarch 2015. Ta conoci cu MUSICA for di 2013, despues di un lucha basta largo contra SAC, a logra di yega na un acuerdo cu SAC pa organisa C&SM. Pa motibonan conoci, MUSICA a yega n’e acuerdo pa laga SMAC ta vergunning houder di C&SM p’e aña 2015.

MANIOBRANAN STRAÑO

MUSICA a sigui bisa cu nan ta lamenta cu di parti di Sr. Randy Thiel y SMAC ta keda hasi maniobranan straño pa pone musiconan y MUSICA den un lus negativo, caminda no tin nodo. MUSICA semper ta keda traha na bienestar di TUR musico y no lo permiti nan nomber wordo atacha na ningun momento.

“Reciente tambe a sali un publicacion di SMAC cu ta bisa cu nan a stort e placa riba e cuenta di MUSICA (cu ta e mesun banco cu SMAC) y ainda MUSICA no a ricibi esaki” MUSICA a bisa.

Por bisa cu MUSICA ya caba ta den pleno preparacion pa Aruba Calypso & Soca Monarch 2016, cu lo priminti di sigui kibra record for di dia cu musiconan a tuma esaki over.