Trahadonan di Arubus a bay den accion

ORANJESTAD – E accion di e trahadonan di Arubus, segun e presidente di sindicato STA, Diego de Cuba, ta netamente esey, y no un welga. Den un carta (di 10 punto) e sindicato a delinea a puntonan principal pa cual e trahadonan a bay den accion. Ta puntonan segun de Cuba, cu ta pasando pa basta tempo caba, manera busnan den estado deplorabel, busnan sin airco den e calor e ultimo dianan. “E accion aki no ta algo di ayera nochi pa awe mainta. E ta algo di basta tempo y nos ta riparando cu apesar cu a cambia e maneho di Arubus, enves di bai dilanti, e la bay atras” de Cuba a bisa.

REACCION DI GERENCIA

Mientras cu e sindicato ta sigura cu practicamente tur bus ta plat, e gerencia ta desmenti esey. “E accion di trahadonan di Arubus diaranson merdia no a logra pone full e compania plat”. Asina e director di e compania, Teo Croes a bisa NoticiaCla.com. Ta mitar di e operacion a keda afecta. Si Croes a pidi disculpa na e usuarionan pa e inconveniencia cu a wordo causa. Tambe Croes no ta considera e 10 puntonan cu e la ricibi como motibo pa e accion di ora, como valido. Segun Croes, for di un dia prome e sindicato tabatin invitacion pa pone e lugar plat pa motibo di airco den bus, of falta di esaki. E accion a cuminsa pa 12:30pm pa un duracion di 2 ora.

KEHO DI AIRCO

Segun Croes, Arubus tin 36 aña di existencia y 30 largo e busnan nunca no tabatin airco. Na 2008 a haya busnan chines luton cu airco, pero esaki no a wanta mucho. A drecha e airconan y cada bes nan ta daña. Pa 4 aña caba e busnan cu airco, ta coriendo sin airco. E busnan volvo y bluebird no tin airco tampoco. Croes tin comprension si pa e asunto di airco, mirando e situacion abnormal di calor cu tabatin ultimo dianan sigur. E ta fastioso pa e chauffeur sigur. Pero ora cu e airco di e busnan daña, nan no tabata avisa esaki pa medio di un storingsstrook. Pues esey no ta yuda. Di tur e busnan cu tin airco, tin 3 daña, y 10 cu ta trahando cu airco. Na november ta yega 6 busnan Marco Polo cu airco. “No ta cosnan cu nos no ta trahando ariba” Croes ta sigui bisa.

BUSHALTE

Un otro keho tabata bushalte na hotel, cu no tin suficiente iluminacion.

UPGRADE MACHINE

Un punto cu tambe ta un keho ta e upgrade di e machinan den e busnan cu mester wordo drecha. No ta tur, pero algun y ta trahando riba esaki tambe pa no tin problema mas pa print.

BUS SUSHI

Busnan sushi tambe ta un keho, pero aki tambe a traha ariba unda cu ta buscando mashin pa haci e busnan limpi.

BUS DEN MAL ESTADO

E punto aki a causa hilaridad serca e director pasobra segun Croes, ningun bus cu ta malo, no ta sali riba caya. “Pa safety reasons garashi no ta laga ningun bus sali daña pasobra esey ta e policy di dje. Tin biaha tin shortage di bus pasobra garage no ta clear e bus pa core. Safety concerns no ta cuadra.

Esun mas ironico segun Croes tabata esun di uniform

CAMBIA COLOR DI UNIFORM

Segun Croes e trahadonan kier pa cambia e camisa bek pa color geel, for di e blauw cu nan ta bistiendo awor. E motibo ta cu ta usa carson blauw scur cu ta trek hopi solo. “Tin 36 aña ta usando carson blauw, y diripiente e ta trek calor”. Algo cu tambe a causa hilaridad serca e director.

INKRIMPING DIENST

A purba haci inkrimping berdad pa evita pago di overtime cu ta pone cu tin menos personal y cu nan no por haya nan break manera mester ta.

CAMBIO DI WARDA

Trahadonan ta keha pasobra nan no tin bida social pasobra ta tres biaha pa luna so e mag di cambia warda. “Den CAO ta poni 2 biaha pa luna. Nos ta toler'e na tres of te hasta 4. Awor ta pidi pa aumenta esaki na 5 of 6. Bo ta pone e compania plaat, perhudicando hende, y despues bo ta sugeri esey. Y tambe tin vakantie planning. Nan (trahadonan) ta keda cu ta nenga vakantie. Pero e problema segun Croes ta cu 85% no ta yena nan vakantie planning, pero si nan kier yega diabierna pidi vakantie pa dialuna. Cosnan asina ta tuma lugar.

SEGURIDAD NA BUSHALTE

Esaki ta e ultimo punto cu Croes tin tur comprension. Segun e trahadonan, autonan ta djis subi tereno di e bushalte na Playa, y ta algo cu Croes mes a experencia. Como tal nan ta trahando riba esey pa remedia e situacion. Ta planeando pa sera esaki cu un boom.

PUNTONAN NO TA VALIDO

Croes ta sinti cu tur e puntonan, of mayoria a wordo discuti den un reunion, pues e no ta considera e motibo di e accion di e trahadonan como valido. Lo no tuma repercusion contra e trahadonan, pasobra tur tin derecho di welga, pero e gastonan financiero incuri, manera placa cu tin cu wordo duna bek, ta bay pa gasto di e sindicato, segun Croes.