Situacion di holo den edificio di DIMAS/DAO ta status quo awe

ORANJESTAD – E situacion cu e edificio di DIMAS a sigui ‘status quo’ awe. Esaki den sentido cu no tin mucho cambio cu e situacion di ayera ora cu un piso a keda ‘evacua’ pa motibo di problema di holo atrobe. Segun directora di DIMAS, Kathy Ruiz Paskel na NoticiaCla.com awe mainta, el a confirma cu e prome piso (archief), ta sigui mescos, y cu no tin mucho cambio. DOW a haci su opname di e situacion y a conclui cu e problema di holor ta origina for di piso uno. Como tal a pidi pa no uza e area ey. Esey ta nifica cu lo pidi permiso pa manda e personal di e piso ey caso atrobe.

MAL HOLO DESPUES DI 10 LUNA

Ayera NoticiaCla.com a raporta den forma di primicia, cu despues di 10 luna cu e edificio tabata ‘liber di problema’, DIMAS y DAO un biaha mas a confronta problema cu holo. E situacion a bolbe parcialmente, y mientras cu te awor, segun su director Kathy Ruiz-Paskel, DIMAS ta programa pa habri normal diaranson, pero cos por cambia ainda. Un piso si a wordo manda cas (prome piso) pasobra eynan tabata mas afecta. Algun otro trahado di otro piso tambe a ‘ruk in ziek’ cu ta nifica cu durante ora di trabou nan a dicidi di meld cu nan ta sinti malo.

PASONAN TUMA 

Pa loke ta e pasonan cu DIMAS a tuma den curso di ayera, Ruiz a raporta e.o. cu e asina yama ARBO deskundige di Sociale Verzekerings Bank (SVB) a bin, cu ta e expertonan riba condicionnan na pia di trabou. Sinembargo nan no por a haci mucho pasobra e personal di limpiesa di DIMAS a uza detergente pa ‘mitiga’ e holo. DOW tambe a bin check e sistema di riolering rond di e edificio, y tambe a haci nan ‘opname’ paden. “ Nan lo bolbe mayan ora SVB tambe ta presente."

RESULTADO DI INVESTIGACION 

Te na e momentonan aki, Ruiz no por a confirma e resultado di e investigacion conduci pa DOW. Pa loke ta e ARBO deskundige, nan a tuma nota di e kehonan di salud (rash, garganta pica, dolor di cabes, dolor di wowo) pero lo duna un conseho ora cu realisa su midimento obhetivo mas den curso di mayan.

TRAHADONAN MALO 

“Cu excepcion di piso 1 cu mi mes a manda cas, 4 trahado di otro piso a ‘ruk in ziek’. Y debi na e problema di coriente di awe tardi (problema boiler WEB), e director interino a manda demas personal cas 4’or. “Depende kico SVB y DOW informami, lo nos determina e proximo pasonan” Ruiz a finalisa bisando NoticiaCla.com ayera.