Cantidad di ‘turista’ venezolano cu ta keda Aruba ta alarmante

ORANJESTAD – E problema di venezolanonan cu ta drenta Aruba como turista y no ta bolbe, ta mas grandi cu hopi a kere. Mientras cu ayera den e vespertino Amigoe, e hefe di imigracion Gerald Vingal ta confirma cu por lo menos 2000 ‘turista’ no ta bolbe bek, e cifra ta mas grandi. Informacion adicional cu NoticiaCla.com a logra compila ta mustra cu e cifra exacto ta   2373 Venezolano turista cu a surpasa nan estadia turistico (mas cu 90 dia) te cu fin di september.

AUMENTO

Adicional NoticiaCla.com a investiga cu esaki ta casi 50% mas cu añan pasa. Esey ta nifica tambe cu den average, pa luna tin mas of menos 400 venezolano ‘illegal’ ta drenta Aruba. Nan ta drenta ‘legal’ pero despues nan status ta bira ‘illegal’. Den e vespertino Amigoe, nan ta relata riba e cantidad di turista cu a yega Aruba e aña aki, segun cifranan difundi di Aruba Tourism Authority. Aki ta mustra e.o. cu e cantidad a aumenta cu 49.9%. For di e cantidad aki, e cifra di ‘turista’ venezolano tambe ta aparece.

AVION ENBES DI BOTO

E situacion masha tempo a bira cu, contrario na yega Aruba pa medio di boto, e turista ta opta mas lihe pa bin Aruba cu avion, legal, y surpasa su estadia intencionalmente cu e fin pa biba na Aruba y busca su porvenir aki awor. NOTA. FOTO ta un bista cu a bira hopi usual na Aruba awor. E ta trata di e grupo di venezolano cu ta bin pa keda y raspa, gasta menos posibel y ta trafica tur caminda, na pia pa por scapa placa.