Parlamento hulandes dividi riba migracion Venezolanonan pa Caribe Hulandes

DEN HAAG – E discusion riba posibel exodo di Venezuela pa Caribe Hulandes, incluyendo Aruba, ta un topico cu lo keda discuti entre awe y mayan den parlamento hulandes. E ora lo trata e plannan di relacionnan di reino pa otro aña. Den medionan hulandes, ta resalta cu e preocupacion riba peliger pa e exodo for di Venezuela, ta dividi entre partidonan di coalicion. Mientras cu e partido VVD ta precupa, PvdA ta mustra cu no tin motibo pa preocupacion ainda.

REACCION PARLAMENTARIONAN

Loke si tur ta di acuerdo, ta cu tin mas y mas persona di tanto Colombia como Venezuela, crusando e frontera y yegando e islanan di Reino Hulandes. Segun medionan hulandes, un mayoria di parlamento ta teme cu e migracion aki di latinonan extra, lo bay for di man. Parlamentario di CDA van Toorenburg kier sa con gabinete Rutte ta reacciona riba esaki. “Nan por move basta facil pa teritorio hulandes, y esey ta sosodiendo tambe. Nos mester tuma accion prome cu e bira un problema grandi”. Ainda e problema no ta grandi, pero ta parse cu den futuro esaki lo cambia. Den caso di partido PVDA, e miembro van Laar no ta kere cu mester di accion awor. “E hendenan aki tin derecho pa pidi asilo (politico). Tambe riba e islanan”. Di otro banda parlamentario di PVV, Sietsma, ta pidi pa sera e frontera den e parti caribense, cu Hulanda. “Haya un pasaporte hulandes e manera aki no mester por. Nos tin basta problema aki cu peticion di asilo politico”. Awe y mayan parlamento lo discuti ariba e topico aki entre otro.