Ruiz: No ta conoci ainda kico a afecta edificio di DIMAS/DAO awe

ORANJESTAD – Despues di 10 luna cu e edificio tabata ‘liber di problema’, DIMAS y DAO un biaha mas a confronta problema cu holo. Manera NoticiaCla.com a raporta mas prome diamars, e situacion a bolbe parcialmente, y mientras cu te awor, segun su director Kathy Ruiz-Paskel, DIMAS ta programa pa habri normal diaranson, pero cos por cambia ainda. Un piso si a wordo manda cas (prome piso) pasobra eynan tabata mas afecta. Algun otro trahado di otro piso tambe a ‘ruk in ziek’ cu ta nifica cu durante ora di trabou nan a dicidi di meld cu nan ta sinti malo.

PASONAN TUMA

Pa loke ta e pasonan cu DIMAS a tuma den curso di awe, Ruiz a raporta e.o. cu e asina yama ARBO deskundige di Sociale Verzekerings Bank (SVB) a bin, cu ta e expertonan riba condicionnan na pia di trabou. Sinembargo nan no por a haci mucho pasobra e personal di limpiesa di DIMAS a uza detergente pa ‘mitiga’ e holo. DOW tambe a bin check e sistema di riolering rond di e edificio, y tambe a haci nan ‘opname’ paden. “ Nan lo bolbe mayan ora SVB tambe ta presente.

RESULTADO DI INVESTIGACION

Te na e momentonan aki, Ruiz no por a confirma e resultado di e investigacion conduci pa DOW. Pa loke ta e ARBO deskundige, nan a tuma nota di e kehonan di salud (rash, garganta pica, dolor di cabes, dolor di wowo) pero lo duna un conseho ora cu realisa su midimento obhetivo mas den curso di mayan.

TRAHADONAN MALO

“Cu excepcion di piso 1 cu mi mes a manda cas, 4 trahado di otro piso a ‘ruk in ziek’. Y debi na e problema di coriente di awe tardi (problema boiler WEB), e director interino a manda demas personal cas 4’or. “Depende kico SVB y DOW informami, lo nos determina e proximo pasonan” Ruiz a finalisa bisando NoticiaCla.com.