Bermudez: Fraude machine di swipe ta fulmina exportacion di divisas

ORANJESTAD –Minister di finanza Angel Bermudez ta considera e asunto di fraude di swipe machines, un fenomeno nobo unda cu negoshinan por pasa placa di credit card y haya placa den efectivo. NoticiaCla.com a raporta riba e asunto aki siman pasa. E mandatario ta conciente di e problema aki y ta considere algo problematico.

BLOKEA TRANSACCION

“Banco Central a confirma'mi cu enberdad nan a wordo informa pa banconan local, cu nan ta bay hiba e maneho aki y blokia e tipo di transaccionnan aki” Bermudez a sigura NoticiaCla.com. E motibo segun Bermudez, ta cu e banconan ta hayando problema cu e.o. Visa y Mastercard cu tambe ta ripara cu e carchinan aki ta wordo usa pa cambia valuta y pa lanta valuta. Algo cu no mester ta e situacion.

SITUACION NO BENEFICIOSO PA ARUBA

E problema segun Bermudez, ta cu e asunto aki no ta beneficioso pa Aruba. “Simplemente pasobra bo ta swipe un carchi. Bo ta lanta e dollarnan y no ta gasta e dollarnan akinan (na Aruba). Nan no ta bay den nos economia pasobra ta dollarnan ta bay den exterior” Bermudez a sigui bisa. Como tal bo ta ‘bezig’ ta fulminando riba exportacion di divisas, cu no ta beneficioso pa nos balansa di pago y pa nos foreign reserve exchange. “Mi ta kere cu riba su mes cu ta bon pa e banconan mitiga e practica aki, y trecele bek na un forma mas manehabel, y caminda cu nan ta licencia pa haci tipo di transaccionnan asina. No esunnan cu tin e swipe machinan, pa via cu nan tin un negoshi y nan tin un relacion cu un banco local”.

TAREA DI GOBIERNO

Bermudez a splica cu gobierno no por haci mucho den caso aki. “Ta un actividad di parti di e banconan local”. Loke cu e mandatario ta haya si, ta cu e banconan y por medio di nan asociacion, mester publica tipo di decisionnan asina cu nan ta bay ehecuta ora cu nan haci cambio di nan maneho” Bermudez a bisa. “Esey mi no a weita ni scucha ningun caminda. Y mi a compronde cu e comerciantenan, cu nan no ta mucho contento” Bermudez a bisa finalmente.