Co.lab a lansa 'workspace' pa startups na Aruba

ORANJESTAD – Recientemente co.lab a lansa un producto nobo pa entrepreneurs y startups na Aruba: Workspace. Despues di luna nan di preparacion, finalmente e team di co.lab a lansa Workspace durante un launch event, caminda invitadonan a haña un tour y splicacion di locual e Workspace ta ensera. Despues di e tour invitadonan a disfruta di e launch party den cura unda por a network den un atmospfera ameno y goza di e musica di DJ Top Rankin.

PRODUCTO NOBO

Workspace, cu ta situa na Anasastraat 4 na Dakota, ta e siguiente den e series di producto y servicio nan cu co.lab a bin ta ofrece. Workspace ta e solucion pa tur hende cu kier traha den un atmosfera profesional sin cu mester sinti nan mes mara na un contract of oficina pa un termino largo of na prijsnan halto. Workspace ta ofrece diferente opcion pa por traha. Asina por huur un lessenaar pa dia, pa siman of pa luna. Por scohe entre un lessenaar den e area habri of priva. Tambe tin posibilidad pa huur un meeting room pa ricibi cliente of pa duna presentacion. Los di por huur un lessenaar tambe tin oficina nan priva cu por huur pa un luna of mas. Tambe tin posibilidad pa huur Workspace pa por ehempel duna workshops of pa (host) evento. E enfasis di Workspace ta pa ofrece flexibilidad na entrepreneurs, startups y freelancers.

MAS BENEFICIO

Otro beneficio nan cu tin ta cu na Workspace bo ta encontra otro entrepreneurs, startups y freelancers den diferente ramo y asina expande bo network y te hasta crea oportunidad nan nobo pa colabora.

KICO CO.LAB TA

co.lab ta un community cu ta trece entrepreneurs, startups, freelancers, business professionals y artista nan hunto pa intercambia idea nan y conocemento cu e enfoque pa yuda otro cuminsa y/of mehora nan compania. E community ta activo desde mei 2014 y ta organisa evento nan tur luna manera First Friday, Table Talk, Time2Think sessions y mas. Bo tambe por forma parti di co.lab door di bira miembro y disfruta di varios beneficio ku co.lab ta ofrece. Pa mas informacion over di co.lab y Workspace por yama libremente na 5847474, subi e Facebook page www.facebook.com/colabcommunity.aruba of website www.colab-aruba.com.