Campeonato division honor ta cuminsa diamars 6 oktober 2015

ORANJESTAD - Diamars 6 oktober 2015, pa 8:00 PM e Division mas halto di Aruba su futbol, Division di Honor lo cuminsa, ora cu e abehanan di Dakota lo enfrenta e campeonnan di Division Uno, e piratanan di Caravel. Dakota y Caravel tur dos a mustra cu nan ta den bon forma durante e temporada di preparacion y tambe den e torneo Copa Don Elias Mansur. Dakota cu tradicionalmente ta conta cu un grupo grandi di talentonan y Caravel cu a reforsa su mes hopi bon pa e campeonato lo brinda un publico un tremendo wega di futbol. Diaranson 7 di oktober 2015, e campeonnan di 2014/ 2015 e tricolornan di Solito, RCA lo cuminsa cu e defensa di nan titulo, ora cu pa 8:00 PM den CDGT nan ta enfrenta e orguyonan di Noord, Bubali. Diahuebs 8 oktober, FC San Nicolas ta cuminsa cu su di dos campeonato den e Division Honor, contra e equipo for di Piedra Plat, Britannia. Diasabra lo tin un doubleheader, pa 6:30 PM Riverplate ta hunga contra La Fama y pa 8:30 PM Estrella ta hunga contra Nacional/ Washington. Wak e schedule aki.