Dialuna a cuminsa klem auto cu multa si parkeer malo

ORANJESTAD – Despues di a wanta pa un luna largo, dialuna Aruparking a cuminsa implementa e regla di klem auto y duna multa pa infraccion di parkeer. Minister di transporte Otmar Oduber a confirma dialuna mainta na NoticiaCla.com cu enberdad, dialuna no tabatin awa pa laba, y awor si, esnan cu comete infraccion, lo haya nan mes sirbi cu un multa, un klem, of ambos. No ta conoci si awe caba a pone klem cu e consecuencia ey.

FIN DI SIMAN A KLEM SIN MULTA

Den fin di siman caba e parkeerwachternan di Aruparking a cuminsa klem auto, pero e diferencia tabata cu nan por a simplemente avisa cu nan a haya nan mes ‘geklemd' y por a bay despues sin paga multa. Basta hende a haya klem, y uno te hasta a haya su mes mal sirbi ora cu e la purba haci sabi. El a haya un klem, a purba kita esaki su mes, y den e proceso a kibra e klem. El a wordo deteni y awor mester paga pa e klem kibra. Segun Arubaparking a splica NoticiaCla.com dialuna, si e persona a simplemente acudi na e oficina, nan lo a kita e klem sin gasto, ya cu e tabata den periodo ‘di prueba ainda’.

KLEM POR TAMBE SIN CU TA PARKEERVAKJES

“Ta cuminsa klem e autonan cu no ta cumpli cu leynan di trafico na prome lugar, como tambe ta (aplica) regla pa e parkeervakjesnan” Oduber a bisa. Mesora a coregi cu e ley nobo ta cubri henter un zona unda cu no por parkeer tampoco pero cu no tin parkeervakjes, unda cu tambe e parkeerwachternan por duna un multa. “Si bo parkeer riba zona cu no mag parkeer, of si bo ta parkeer contra reglanan di trafico den areanan cu bo no mag of riba acera, cu e parkeerwachternan aki lo klem automaticamente sin sticker, sin nada”. E no tin di haber cu ley di parkeerwachter, sino cu e ley di trafico. Pues si bo ta viola e ley, bo ta haya bo cu multa y klem