Oduber: Negoshinan mes kier parkeermeter bandi nan

ORANJESTAD – Cierto negoshinan a manda carta pa gobierno pa pidi pa pone parkeermeter banda di nan negoshi. Esaki minister di transporte Otmar Oduber a bisa NoticiaCla.com dialuna, reaccionando riba e comentario recien di Camara di Comercio, cu a bisa e.o. cu benta di comercio a baha drasticamente. E mandatario a confirma cu e la tuma nota di camara di comercio y a sigura cu lo ‘mehora mas cu ta posibel’.

COMERCIANTENAN POSITIVO

Mes momento e mandatario a mustra cu mientras cu tin cierto critica di e gremio aki, si tin comerciantenan cu ta experienciando e parkeermeters den un forma positivo. A te hasta duna ehempel di negoshinan cu segun Oduber, a pidi pa pone parkeermeter serca di nan nan lugar. Lugarnan manera dilanti di Kentucky (Fried Chicken), Corte di Husticia, tiendanan eybanda manera Kini Kini etc. Segun e mandatario, nan a manda carta pa gobierno pone parkeermeters. Esaki pasobra nan a mira e efecto cu parkeermeter tabatin pa otro areanan cu a libera lugarnan di parkeer. Pues e mandatario kier mustra cu esey, cu tin positivismo den e parti cu normalmente ta bin dilanti den medionan di comunicacion como aspectonan negativo.

CAMARA DI COMERCIO

E mandatario, mustrando e parti positivo di e comentario di Camara di Comercio, a sigura cu e gremio a mustra claramente cu nan no tin problema cu e parkeermeter y cu e ta algo negativo. Loke cu segun Kvk a haci, ta meramente trece algun opinion individual di comerciantenan, depende unda nan ta ubica, kico nan ta bende y si e ta perhudica esaki. “Nos ta tuma e puntonan aki den consideracion y ta mira con por mehora esaki” Oduber a bisa. E ta conciente cu e ta keda un discusion con pa implementa esaki. Esta si mester a implementa esaki den fase of no, duna mas informacion etc y asina tin un sin fin di posibilidad cu por a tuma lugar y cu no a tuma lugar.